Jetisýda naızaǵaı saldarynan malshy kóz jumdy

Foto: ashyq derekkóz

Jetisý oblysy Eskeldi aýdanynyń Zernosovhoz aýylynda jaıylymda júrgen eki malshynyń birin naızaǵaı uryp, qaıǵyly oqıǵa oryn aldy. Er adam sol jerde kóz jumdy. Onyń janyndaǵy eki jylqysy men ıti de oqıǵa ornynda mert bolǵan, dep habarlaıdy qandastar.kz

Kýágerlerdiń aıtýynsha, oqıǵa kún kúrkirep, jańbyr jaýǵan kezde bolǵan. Eki jylqyshy mal aıdap kele jatqan. Kenetten naızaǵaı ashyq dalaǵa túsip, bir jylqyshyny, janýarlarymen birge, bir sátte jalmap ketken.

— Bári bir sátte boldy. Qasyndaǵy serigi sál árirekte júrgendikten aman qaldy. Biraq qatty kúızelip júr. Áli es jııa almaı júr, — deıdi aýyl turǵyndary.

Qaıtys bolǵan azamatty aýyldastary eńbekqor, sabyrly ári jany taza adam retinde sıpattaıdy. Qazir búkil aýyl qara jamylyp otyr.

— Biz kúnde daladamyz, keń jaıylymda júremiz. Eshkim mundaı bolady dep oılamady. Jaı ǵana jumysqa shyqqan edi, ıtin, jylqylaryn alyp… Sóıtip kóz jumdy, — dep kúrsindi aýyl aqsaqaly.

Aýdandyq ákimdik marqumnyń otbasyna qoldaý kórsetiletinin málimdedi. Sondaı-aq, naızaǵaı kezinde qaýipsizdik erejelerin saqtaý boıynsha túsindirý jumystaryn kúsheıtý josparlanyp otyr.