“جيھاد جاساعىم كەلدى”: تەرروريزمدى ناسيحاتتادى دەپ ايىپتالعان 16 جاستاعى قازاقستاندىق وقيعاسىن ءبولىستى

فوتو: سكرين

سوڭعى جىلدارى ەكسترەميستىك يدەولاگيانىڭ ىقپالىنا ءتۇسىپ, تەرروريزمدى ناسيحاتتاپ, جيھاد جاساعىسى كەلگەن بالالاردىڭ قاتارى كوبەيگەن. ەكسترەميزمدى ناسيحاتتادى دەپ ايىپتالعان 16 جاستاعى ءجاسوسپىرىم بولعان وقيعا تۋرالى ايتىپ بەردى. بۇل تۋرالى qandastar.kz اقپارات اگەنتتىگى قاۋىپسىزدىك قىزمەتىنىڭ “ارباۋ” فيلمىنە سىلتەمە جاساپ حابارلايدى.

2023 جىلى 42 ادام دەسترۋكتيۆتىك ارەكەتتەرى ءۇشىن قىلمىستىق جازاعا تارتىلعان. ونىڭ ەكەۋى كامەلەتكە تولماعان بالالار. بيىل 68 ادام سوتتالعان. ولاردىڭ ىشىندەگى بەسەۋى بالا.

سولاردىڭ ءبىرى 16 جاستاعى ايبەك(اتى ويدان شىعارىلعان). ول جەلىدەگى توپتارعا كىرىپ, ءارتۇرلى ەكسترەميستىك سيپاتتاعى ۆيدەولار تاراتقانى ءۇشىن سوتتالعان. ءجاسوسپىرىم ءوزىنىڭ جيھاد جاساعىسى كەلگەنىن دە جاسىرمادى.

«16 جاستامىن. ەكسترەميزمدى ناسيحاتتايتىن ۆيدەولار تاراتقانىم ءۇشىن جازامدى وتەپ جاتىرمىن. “ۆيالاتي كاۆكاز” دەگەن Telegram ارناعا كىردىم. احماد دەگەن بالامەن تانىستىم. دجيھادقا شاقىراتىن ۆيدەولار سال دەپ ايتتى ماعان. تەلەگرامعا كىرىم “داۋل-اتل-يسلام” دەگەن كانال اشتىم. سول كانالعا سالدىم. سيرياعا بارىپ جيھاد جاساعىم كەلدى. توپ اشىپ ول توپتىڭ سىلتەمەسىن TikTok-قا سالدىم. سىبايلاسىم “يسلام مەملەكەتى” دەگەن تاعى ءبىر ارناعا سىلتەمە جىبەردى, وعان دا قوسىلدىم. ول جەردە ناماز وقىماي, اللاعا قارسى شىققان ادامداردى ولتىرەتىن ۆيدەولار ەدى. يۋتۋبتان ۋاعىز تىڭداپ, سايتتارىن وقىدىم”, – دەيدى ول.

ايبەكتىڭ اناسى بالاسى بىرنەشە رەت ۆيدەو كورسەتكەنىن, مۇنداي ۆيدەولارعا ءمان بەرمەگەنىن ايتادى.

«ماعان Telegram-نان ۆيدەو كەلدى دەپ كورسەتتى. ىشىندە بىرەۋدىڭ باسىن ەكىنشى بىرەۋ كەسىپ جاتىر. مەن ءمان بەرمەدىم. مۇندايدىڭ تالايىن كورگەنبىز عوي دەپ قويا سالدىم. ناۋرىز ايىندا ورازا ۋاقىتىندا TikTok الەۋمەتتىك جەلىسىندەگى بالالارمەن كەزدەسىپ باستادى. ارابشا مۋزىكا تىڭدايدى. ءبىزدىڭ ساۋاتىمىز بولماعان سوڭ, بالادا ءدىني ساۋات قايدان بولسىن. ونداي زاڭ بار ەكەنىن دە بىلمەيمىز”, – دەيدى ءجاسوسپىرىمنىڭ اناسى.

ءجاسوسپىرىم ءارتۇرلى تەرروريستىك ۇيىمداردى ناسيحاتتايتىن ۆيدەولاردى ءبولىسىپ, باسقالارىن دا جيھادقا شاقىرعان.

«ۆيدەونىڭ مازمۇنىندا دايش تەرروريستىك ۇيىمىنىڭ سودىرلارى بەينەلەنگەن. اسا قاتىگەزدىكپەن ادام ولتىرگەن. ارنايى قىزمەتتىڭ ادامدارىن ۇستاپ الىپ, اياۋسىز ولتىرگەن ۆيدەولاردى بولىسكەن. وعان قوسا ۇستىنە اراب ۇلتىنىڭ كيىمىن كيىپ, ءۇيىنىڭ ماڭىندا بەينەروليكتەر ءتۇسىرىپ, جيھادقا شاقىرىپ, جيھادقا شىعۋ ويى بار ەكەنىن اشىق بولىسكەن”, – دەيدى جەدەل قىزمەتكەر.

ەسكە سالساق, وسىعان دەيىن قازاقستان ازاماتى تەرروريزمدى ناسيحاتتاعانى ءۇشىن سوتتالعانىنجازعانبىز.