جاڭالىقتار
جىتىقاراداعى 5 بالانىڭ ولىمىنە نە سەبەپ بولعانى ايتىلدى
فوتو: تجم
قوستاناي وبلىسىنىڭ اكىمى قۇمار اقساقالوۆ جىتىقارا قالاسىندا ءبىر وتباسىنىڭ بەس بىردەي بالاسىنىڭ اجالىنا سەبەپ بولعان توتەنشە جاعدايعا تۇسىنىك بەردى, دەپ حابارلايدى qandastar.kz
— وكىنىشكە قاراي, بەس بالا قايتىس بولدى. بۇقارالىق اقپارات قۇرالدارىندا بالالاردىڭ جالعىز, قاراۋسىز قالعانى تۋرالى حابارلاندى. جالعىز ءتىرى قالعان ءۇيدىڭ ۇلكەن بالاسى تاڭەرتەڭ تۇرىپ پەشتى جاعۋعا تىرىسقان بولۋى كەرەك. ول پەشكە وتىنمەن بىرگە ول تاعى ءبىر نارسە سالعان, سول جارىلىسقا سەبەبى بولعان. قايعىلى وقيعادان كەيىن بىردەن بالالاردىڭ اناسىمەن كەزدەستىم, بىرنەشە كۇن ىشىندە وتباسىعا ەكى بولمەلى پاتەر ساتىپ الىندى, – دەدى قۇمار اقساقالوۆ ءوڭىردىڭ الەۋمەتتىك-ەكونوميكالىق دامۋى تۋرالى ەسەپ بەرۋ بارىسىندا.
sn.kz جازعانداي, اكىمنىڭ ايتۋىنشا, زارداپ شەككەن وتباسىنا قارجىلاي قولداۋ مەن پسيحولوگيالىق كومەك كورسەتىلدى.
— ەندى ءبىز ءۇشىن مۇنداي جاعدايدىڭ قايتالانباۋى ماڭىزدى. جىلۋ ماۋسىمى الدىندا جەرگىلىكتى اتقارۋشى ورگانداردىڭ قىزمەتكەرلەرى مەن ءورت قىزمەتى ماماندارى بارلىق ءۇيدى ارالاپ ءتۇتىن مۇرجاسىنىڭ, پەشتىڭ جاي-كۇيىن تەكسەرىپ شىقتى. جىلۋ كوزدەرىن قالاي دۇرىس پايدالانۋ كەرەكتىگى تۋرالى نۇسقاۋلىق بەرىلدى, – دەيدى ول.
