جوعالعان زاتتى تاۋىپ العان قازاقستاندىقتار جازا ارقالاۋى مۇمكىن

فوتو: Freepik.com

ەلىمىزدە جوعالعان زاتتى تاۋىپ العان ادام ايىپپۇل ارقالاۋى مۇمكىن. ولار ەندى كۇدىكتى رەتىندە ۇرلىق بابىمەن جاۋاپقا تارتىلۋ قاۋپى بار. سوندىقتان ماماندار كوشەدە جاتقان بوتەننىڭ زاتىن الماۋعا كەڭەس بەرەدى. ال يەسىن تابۋعا كومەكتەسەتىن نيەت بولسا, دالەل-دايەك جيناۋ ماڭىزدى دەيدى. بۇل تۋرالى qandastar.kz ينفورمبيۋرو جاڭالىقتار باعدارلاماسىنا سىلتەمە جاساپ حابارلايدى.

كوشەدە نەمەسە قوعامدىق ورىندا اقشا, ءاميان, ۇيالى تەلەفون تاۋىپ العان جاعدايدا ونى قاي جەردەن, قالاي تاپقانىن ۆيدەوعا ءتۇسىرىپ الۋ كەرەك. سودان كەيىن پوليتسياعا حابارلاسىپ, ءتارتىپ ساقشىلارىنىڭ كەلگەنىن كۇتۋ كەرەك.

جوعالعان اقشانى تاپقان ادامعا «ۇرلىق» بابىمەن ءىس قوزعالۋى مۇمكىن. زاڭگەرلەر مۇنداي جاعدايلار كەزدەسكەنىن ايتادى. ماماندار سمارتفون تاۋىپ العان جاعدايدا يەسى تابىلعانشا وزىڭىزدە ساقتاي الاسىز دەپ وتىر. بىراق تەلەفوندى قوسۋعا بولمايدى. ويتكەنى ونىڭ ىشىندە ادامنىڭ فوتو-سۋرەتتەرى, بانك قوسىمشالارى مەن جەكە مالىمەتتەرى ساقتالادى. ول ازاماتتىڭ جەكە ومىرىنە قول سۇعۋ بولىپ سانالادى.

“كوشەدە نەمەسە قانداي دا ءبىر مەكەمەدە زات, م ۇلىك تاۋىپ السا, مىندەتتى تۇردە جەرگىلىكتى اتقارۋشى ورگاندارعا, پوليتسيا قىزمەتكەرلەرىنە حابارلاۋعا مىندەتتى. ول زاتتى ءوزىڭىز پايدالانىپ كەتسەڭىز, پوليتسيا قىزمەتكەرلەرى سىزدەن ونى تاپقان جاعدايدا ايىپ تاعۋى مۇمكىن. ۋاقىتىندا حابارلاماعانىڭىز ءۇشىن كۇدىكتىگە اينالاسىز. سىزگە ساقتاۋعا بەرسە, قولحاتپەن تاپسىرىلادى. سونىمەن قاتار, ساقتاۋ شىعىندارىن دا تالاپ ەتە الاسىز”, – دەدى زاڭگەر نۇربولات يبراەۆ.

ەگەر تاۋىپ العان زاتتىڭ يەسى انىقتالسا,  ول ادامنان سىياقى سۇراۋعا قۇقىڭىز بار ەكەن. زات قۇنىنىڭ 30%-ىن قاراجات تۇرىندە الا الاسىز. ازاماتتىق كودەكسكە سايكەس پوليتسيا جوعالعان زاتتىڭ يەسىن جارتى جىل ىزدەيدى. 6 ايدان كەيىن تابىلماسا, تاۋىپ العان ادام مەنشىك قۇقىعىنا يە بولادى. ياعني اتالعان زاتتى وزىنە قالدىرا الادى.