جاڭالىقتار
جوعارعى سوت بيشىمباەۆ پەن بايجانوۆتىڭ ءىسىن قارايتىن بولدى: وتىرىس وتەتىن كۇن بەلگىلەندى
فوتو: اشىق دەرەككوز
قۋاندىق بيشىمباەۆ پەن باقىتجان بايجانوۆتىڭ ءىسى بويىنشا سوت پروتسەسىنىڭ كۇنى بەلگىلى بولدى. بۇل اقپارات «سوت كابينەتى» بازاسىندا جاريالاندى, دەپ حابارلايدى KAZ.NUR.KZ.
تامىز ايىندا قازاقستاننىڭ ۇلتتىق ەكونوميكا ەكس-ءمينيسترى قۋاندىق بيشىمباەۆتىڭ ءىسى جوعارعى سوتقا كەلىپ تۇسكەنى حابارلانعان بولاتىن. قازىر ءىس 4 قىركۇيەكتە قارالاتىنى بەلگىلى بولدى. ايتا كەتۋ كەرەك, 6 تامىزدا ادۆوكات ەرلان عازىمجانوۆ Facebook-تەگى پاراقشاسىندا قۋاندىق بيشىمباەۆتىڭ جوعارعى سوتقا جۇگىنبەگەنىن جازعان ەدى. «جوعارعى سوتتا ماعان بيشىمباەۆ ق. مەن بايجانوۆ ب.-عا قاتىستى قىلمىستىق ءىستىڭ سوڭعىسىنىڭ كاسساتسيالىق شاعىمى بويىنشا كەلىپ تۇسكەنىن حابارلادى. بيشىمباەۆ ق. مەن ونىڭ ادۆوكاتتارى جوعارعى سوتقا جۇگىنبەگەن», — دەپ جازدى سول كەزدە زاڭگەر. Tengrinews.kz مالىمەتىنشە, سوت باقىتجان بايجانوۆتىڭ شاعىمىن قاراستىرادى.
- ەسكە سالايىق, سالتانات نۇكەنوۆانى ولتىرگەنى جانە ونى ازاپتاعانى ءۇشىن قۋاندىق بيشىمباەۆقا 24 جىلعا باس بوستاندىعىنان ايىرۋ جازاسى تاعايىندالعان بولاتىن, ول جازاسىن قىلمىستىق-اتقارۋ جۇيەسىنىڭ ماكسيمالدى قاۋىپسىزدىك مەكەمەسىندە وتەيدى.
