“جوعارىداعىلار جاعدايعا سەنبەيدى”: جارتى اي كومادا جاتقان ساربازدى دارىگەرلەر ۇيىنە شىعارعان

فوتو: اشىق دەرەككوز

جارتى ايدان استام كومادا جاتىپ, ويانعان ۇلتتىق ۇلان ساربازى ۇلتتىق نەيروحيرۋرگيا ورتالىعىنان ۇيىنە شىعارىلدى, – دەپ حابارلايدى qandastar.kz.

بۇل رەتتە دارىگەرلەر ەربايان مۇحتاردىڭ جاعدايى كاسىبي مەديتسينا قىزمەتكەرلەرىنىڭ كۇتىمىن قاجەت ەتەتىنىن مويىندايدى. ويتكەنى, ول مەديتسينالىق قىزمەتكەرلەردىڭ باقىلاۋىمەن ۇنەمى ءدارى-دارمەك, انتيبيوتيكتەر, دارۋمەن الۋى كەرەك.

ساربازدىڭ تۋىستارى جەكە دارىگەرلەردىڭ اقىسىن قالتاسى كوتەرمەيتىنىن ايتتى. ونىڭ ۇستىنە ساربازعا مۇگەدەكتىك تاعايىندالماعان جانە ونىڭ ءىسى بويىنشا ءالى دە سوت پروتسەسى باستالمادى. ساربازدىڭ تۋىستارى ءتىپتى “جوعارىداعىلار ەرباياننىڭ ءحالى اۋىر دەگەنگە سەنىڭكىرەمەيدى” دەپ وتىر.

ەسكە سالساق, قاتارداعى جاۋىنگەر ەربايان مۇحتار بىلتىر مامىردا مەرزىمدى اسكەري قىزمەتكە الىنعان. 2023 جىلى 4 جەلتوقسان كۇنى تۇندە الماتىداعى ۇلتتىق ۇلاننىڭ №5571 بولىمىندەگى دارەتحانادا قۇلاپ, باس-ميىنىڭ اشىق جاراقاتىن العان.

ورتالىق كلينيكالىق اۋرۋحاناسىنىڭ انىقتاماسى بويىنشا, ساربازدىڭ باس سۇيەگى جارىلىپ, جەلكە سۇيەگى سىنعان, اۋىر مي جاراقاتىن العان.

اسكەري ءبولىم «سارباز دارەتحانادا ءوزى قۇلاپ, باسىن كافەلگە سوعىپ الدى» دەپ جاۋاپ بەردى.