Jol apatyna ushyraǵan jýrnalıstiń qaltasyndaǵy qomaqty qarjy joǵalyp ketken

Foto: ashyq derekkóz

«Temirqazyq — oı» gazetiniń bas redaktory Anarkúl Amangeldiqyzy jol apatyna ushyrady, dep habarlady qandastar.kz tyrkistan.kz-ke sýlteme jasap.

Bul jóninde ol áleýmettik jelide jazyp, baǵaly zattary men kóp aqshasynan aıyrylyp qalǵany týraly aıtty.

«Bes kún buryn jol apatyna tústim. Janymyzdyń amandyǵyn oılaýdan artyqqa mursha bolmaı, es joǵalyp, birneshe jannyń amandyǵy úshin alańdap, ýaıymdap, álek boldyq. Sol sátte joldaǵy ózge toqtaǵan kólikterdegi me, basqa ma bilmedim sómkem men qaltamdy tonap barlyq aqsha men altyndy úptep ketipti. Ne deýge bolady? Adamgershilikten attaǵan deıin be, ımansyzdar deıin be? Júrekterine qarańǵylyqty qalaı sıdyryp júr eken? Qanǵa boıalǵan aqshany qoryqpaı qalaı aldy eken? Qalaı jaratyp júr eken? Qudaıynan osynshama bezinýge bola ma? Adamdar arpalysyp bireýdiń ómirine arasha bolyp jatqanda Ardan attaǵandar da aramyzda bar eken…Buny jazbas ta edim, biraq, “ashynǵannan shyǵady aщy daýsym”. Osyndaı áreketke bararda oılansańdar eken? Bálkim, ol jerde ólip ketýim de múmkin edi? Biraq, jaqsy adamdar da bar. Dereý jetken 102 men 103 jedel járdem qyzmetkerlerine alǵys… Sońǵy aqsham da shyǵar? Bálkim, bireýge berýge tıis shyǵarmyn? Biraq, altyndy kórgen perishte joldan taıdy. Buıyrsyn. Az aqsha bolmaǵan soń, sol kúni bireý osy aqshany kútip te otyrdy. Amal ne? Bastysy, basymyz aman. Aqshanyń bir mánisi bolar, ıá?Adam degen atqa laıyq bolaıyqshy», — dep jazdy jýrnalıst.