جول ەرەجەسىن ەلەمەگەن: شىمكەنتتىك دەپۋتات جازالاندى

الەۋمەتتىك جەلىدە شىمكەنت كوشەلەرىنىڭ بىرىندە تۇسىرىلگەن داۋلى ۆيدەو تاراپ كەتتى. كادرلاردا جولدىڭ قاق ورتاسىنا توقتاپ العان قىمبات جول تالعامايتىن كولىكتەن ادام ءتۇسىپ جاتقان ءسات بايقالادى. جۇرگىزۋشى دە, جولاۋشى دا قاۋىپسىزدىك بەلدىگىن تاقپاعان, دەپ جازادى qandastar.kz

تەكسەرۋ ناتيجەسىندە جۇرگىزۋشىگە قر اقبتك-ءنىڭ بىرنەشە بابى بويىنشا اكىمشىلىك ءىس قوزعالدى. وعان تاعىلعان ايىپتار: جالعان ءنومىر تاعىپ ءجۇرۋ, قارسى جولاققا شىعۋ, مىندەتتى ساقتاندىرۋدىڭ بولماۋى, قاۋىپسىزدىك بەلدىگىن تاقپاۋ, تىيىم سالىنعان جەردە كەرى ءجۇرۋ جانە بۇرىلىس الدىندا بەلگى بەرمەۋ. كولىك ايىپپۇل تۇراعىنا جەتكىزىلدى. ال جۇرگىزۋشىمەن پروفيلاكتيكالىق اڭگىمە جۇرگىزىلگەن.

جۋرناليست ميحايل كوزاچكوۆتىڭ حابارلاۋىنشا, ءتارتىپ بۇزۋشى – تۇركىستان وبلىسى بايدىبەك اۋداندىق ءماسليحاتىنىڭ دەپۋتاتى, «قاراباتىر» جشس ديرەكتورى ەرعالي امانباەۆ. ول «امانات» پارتياسىنىڭ مۇشەسى بولىپ تابىلادى. پارتيانىڭ اۋداندىق فيليالىنىڭ Instagram پاراقشاسىندا امانباەۆتىڭ قۇرىلىس نىساندارىن ارالاپ جۇرگەن سۋرەتتەرى جاريالانعان.