جولسەرىكتىڭ جونسىزدىگى: جاڭا ادامداردىڭ بەلسەندىسى پويىزدا الىمساقتىققا تاپ بولعان

فوتو: جاڭا ادامدار

جۋىردا №076حا (قىزىلوردا–پەتروپاۆل) پويىزىندا الىمساقتىققا ۇشىراعان قىزدىڭ وقيعاسى باق-تا جاپپاي جاريالانعان بولاتىن. پويىز جولسەرىگى قىزدىڭ اياعىنان ۇستاپ, قولىنان تارتىپ, ۆاگوننان ۆاگونعا دەيىن  سوڭىنان اڭدىعان, ءتىپتى «ۇيىقتاتپايتىنىن» ايتقان. زارداپ شەككەن قىز — جاڭا ادامدار قوزعالىسىنىڭ بەلسەندىسى بولعاندىقتان, بۇل وقيعانى بىردەن الەۋمەتتىك جەلىلەردە اشكەرە ەتۋدى ۇيعارعانىن ايتادى, دەپ جازدى qandastar.kz

جاڭا ادامداردىڭ «تۇمار» ازاماتتىق ناۋقانىنىڭ مۇشەلەرى بەلسەندىمەن سويلەسىپ,  اتىشۋلى وقيعانىڭ ەگجەي-تەگجەيىن انىقتادى.

«ساپار بارىسىندا نىساناعا ىلىنگەن جولسەرىك – 1992 جىلى تۋعان جانىبەك ابدىقالىقوۆ بولىپ شىقتى. وقيعا جاريا بولعاننان كەيىن ول قىزبەن بايلانىسقا شىقتى, الايدا كەشىرىم سۇراپ, كىناسىن مويىنداۋدىڭ ورنىنا قىزدىڭ ونى «دۇرىس تۇسىنبەگەنىن» ايتىپ, اقتالۋعا تىرىستى.

بۇل وقيعاداعى ەڭ قورقىنىشتىسى – الىمساقتىق كەزىندە اينالادا ونداعان ادامنىڭ بولعانى. قىز كومەك سۇراعاندا نەلىكتەن ەشكىم كومەكتەسپەدى? نەلىكتەن جولسەرىك وزىنە ءالى دە تىم سەنىمدى? ويتكەنى اينالاداعىلار ءۇنسىز قالۋعا ادەتتەنگەن. تەرەزەگە, تەلەفونعا, ايتەۋىر باسقا جاققا قاراسا – ماسەلەنى كورمەسە بولعانى. ەشكىمگە ارالاسۋ ءتيىمدى ەمەس. قىزدار ءتىپتى اينالاسىندا ونداعان جولاۋشىلار بار پويىزدا دا ءوزىن قاۋىپسىز سەزىنە المايتىن جاعدايعا جەتتى.

ءبىز ارەكەتسىزدىك تانىتىپ, قىلمىسكەرلەردىڭ وزدەرىن قاۋىپسىز سەزىنۋىنە جانە قىلمىستى قايتا-قايتا جاساۋىنا جول بەرەمىز. ءۇنسىز قالۋ – زورلىقتى قالىپتى نارسەگە اينالدىرىپ, ال بەيجاي بولۋ – تويتارىس الىپ كورمەگەندەر ءۇشىن ارتىقشىلىق بولىپ وتىر», — دەيدى قوزعالىس وكىلدەرى.

بۇل ورايدا جاڭا ادامدار قىلمىستىق الىمساقتىققا ۇشىراعان بارلىق ادامدى بولعان جاعداي تۋرالى دەرەۋ پوليتسياعا حابار بەرۋگە شاقىرادى.