جۇك تاسۋشى اتانىڭ مودەل بولۋىنا جول سالعان ءبىر سۋرەتتىڭ وقيعاسى كوپشىلىكتى تاڭقالدىردى

الەۋمەتتىك جەلىدە جۇك تاسۋشى اتانىڭ گۇل ساتاتىن دۇكەننىڭ مانەكەنى بولىپ شىعا كەلگەن وقيعاسى تارادى, دەپ حابارلايدى Skifnews.kz اقپارات پورتالى.

ۆيدەودا كوشەدە جۇپىنى كيىنىپ, جۇك تاسىپ جۇرگەن قاريانىڭ ادام تانىماستاي وزگەرىپ, گۇل ساتاتىن دۇكەننىڭ مانەكەنشىسى بولىپ شىعا كەلگەنى بەينەلەنگەن.

بۇل وقيعا كوپشىلىكتى تاڭ قالدىردى.

ۆيدەونى ساياحاتشى-فوتوگراف اسىلبەك يماندوسوۆ الەۋمەتتىك جەلىدەگى پاراقشاسىندا جاريالادى.

قاريا ءتۇسىرىلىم توبىندا جۇرگەن فوتوگرافتى كورىپ, ءوزىن بىرنەشە سۋرەتكە ءتۇسىرۋدى وتىنگەن. فوتوگراف كەلىسىپ, كەيىننەن سۋرەتتەردى TikTok جەلىگە جۇكتەگەن.

تۋىندى كوپتىڭ جۇرەگىن ەلجىرەتكەندىكتەن, اسىلبەك يماندوسوۆ اتامەن تاعى ءبىر رەت كەزدەسەدى. ولار بىرگە قاريانىڭ شاشىن قىسقارتىپ, جاڭا كيىمدەر الادى, ءتىپتى جولاي گۇل ساتاتىن دۇكەنگە گۇل الۋعا سوعادى. ال دۇكەن باسشىلىعى اتاعا مانەكەنشى بولۋدى ۇسىنعان.

گۇل ساتاتىن دۇكەننىڭ مانەكەنشىسى بولىپ, جەلى قولدانۋشىلارىن ءتانتى ەتكەن 72 جاستاعى قاريانىڭ ەسىمى — بەرىك.

ول قولىنداعى اربامەن سوڭعى 20 جىل بويى جۇك تاسىعان. جاس كەزىندە كولىك جۇرگىزۋشى, جۇك تاسۋشى, اۋلا تازالاۋشى بولىپ جۇمىس ىستەگەن. ءبىر كەزدەرى تراكتور ايداعان.

مەن كەي ادامداردىڭ تۇنەرىپ جۇرگەنىن كورەمىن. وسى كۇنگە جەتكەنىمىزگە قۋانۋىمىز كەرەك. ەگەر قۇلادىڭ با, قولىڭنان كەلگەنىن جاساپ, اياققا تۇر. مەن وقىماعان اداممىن, بىراق سوندا دا وسىلاي ويلايمىن. مەن مىنا ارباممەن جۇمىس ىستەپ ءجۇرىپ ءۇي تۇرعىزعانمىن, — دەدى كوزىنەن مەيىرىم توگىلگەن قاريا.

جەلى قولدانۋشىلارى قاريانىڭ شىنايىلىعىنا ءتانتى بولىپ ءتۇرلى پىكىر قالدىرعان.

«اتانىڭ حاريزماسى جوعارى ەكەن, ول مودەل بولۋى كەرەك», «بەرىك اتا, 100 جاساڭىز, سۋرەتتەر كەرەمەت شىققان», «وتە جاقسى اتا ەكەن», «گۇل شوعىن ۇستاپ تۇرعان سۋرەتىندە سونداي سۇيكىمدى», «كوزدەرىنەن مەيىرىم توگىلىپ تۇر», — دەپ جازعان ولار.

قازىرگى ۋاقىتتا جەلى قولدانۋشىلارى قارياعا سىيلىق جاساۋ ءۇشىن قاراجات جيناپ جاتىر.