Júk tasýshy atanyń model bolýyna jol salǵan bir sýrettiń oqıǵasy kópshilikti tańqaldyrdy

Áleýmettik jelide júk tasýshy atanyń gúl satatyn dúkenniń manekeni bolyp shyǵa kelgen oqıǵasy tarady, dep habarlaıdy Skifnews.kz aqparat portaly.

Vıdeoda kóshede jupyny kıinip, júk tasyp júrgen qarııanyń adam tanymastaı ózgerip, gúl satatyn dúkenniń manekenshisi bolyp shyǵa kelgeni beınelengen.

Bul oqıǵa kópshilikti tań qaldyrdy.

Vıdeony saıahatshy-fotograf Asylbek Imandosov áleýmettik jelidegi paraqshasynda jarııalady.

Qarııa túsirilim tobynda júrgen fotografty kórip, ózin birneshe sýretke túsirýdi ótingen. Fotograf kelisip, keıinnen sýretterdi TikTok jelige júktegen.

Týyndy kóptiń júregin eljiretkendikten, Asylbek Imandosov atamen taǵy bir ret kezdesedi. Olar birge qarııanyń shashyn qysqartyp, jańa kıimder alady, tipti jolaı gúl satatyn dúkenge gúl alýǵa soǵady. Al dúken basshylyǵy ataǵa manekenshi bolýdy usynǵan.

Gúl satatyn dúkenniń manekenshisi bolyp, jeli qoldanýshylaryn tánti etken 72 jastaǵy qarııanyń esimi — Berik.

Ol qolyndaǵy arbamen sońǵy 20 jyl boıy júk tasyǵan. Jas kezinde kólik júrgizýshi, júk tasýshy, aýla tazalaýshy bolyp jumys istegen. Bir kezderi traktor aıdaǵan.

Men keı adamdardyń túnerip júrgenin kóremin. Osy kúnge jetkenimizge qýanýymyz kerek. Eger quladyń ba, qolyńnan kelgenin jasap, aıaqqa tur. Men oqymaǵan adammyn, biraq sonda da osylaı oılaımyn. Men myna arbammen jumys istep júrip úı turǵyzǵanmyn, — dedi kózinen meıirim tógilgen qarııa.

Jeli qoldanýshylary qarııanyń shynaıylyǵyna tánti bolyp túrli pikir qaldyrǵan.

«Atanyń harızmasy joǵary eken, ol model bolýy kerek», «Berik ata, 100 jasańyz, sýretter keremet shyqqan», «О́te jaqsy ata eken», «Gúl shoǵyn ustap turǵan sýretinde sondaı súıkimdi», «Kózderinen meıirim tógilip tur», — dep jazǵan olar.

Qazirgi ýaqytta jeli qoldanýshylary qarııaǵa syılyq jasaý úshin qarajat jınap jatyr.