جۇمىس بەرۋشىنىڭ ءرولىن ارتتىرۋ تاقىرىبىندا حالىقارالىق فورۋم ءوتتى

فوتو: جەكە قورىنان

الماتىدا جۇمىس بەرۋشىنىڭ ءرولىن ارتتىرۋ تاقىرىبىندا حالىقارالىق فورۋم ءوتتى, دەپ جازادى qandastar.kz.

حالىقارالىق ينجەنەرلىك-تەحنولوگيالىق ۋنيۆەرسيتەتىنىڭ (ميتۋ) بازاسىندا «جاھاندانۋ جاعدايىندا ءبىلىم بەرۋ باعدارلامالارىنىڭ ساپا كورسەتكىشى رەتىندە كاسىبي دايىندىقتا جۇمىس بەرۋشىنىڭ ءرولىن ارتتىرۋ» تاقىرىبىندا حالىقارالىق فورۋم ءوتتى. ءىس-شاراعا جەتەكشى كاسىپورىنداردىڭ جۇمىس بەرۋشىلەرى, ميتۋ باسشىلىعى, سونداي-اق تۇركيا, قىتاي, كورەيا, رەسەي جانە قىرعىزستان ۋنيۆەرسيتەتتەرىنىڭ وكىلدەرى قاتىستى.

ميتۋ رەكتورى, قاۋىمداستىرىلعان پروفەسسور گ.ا. سارسەنبەكوۆا ءوز سوزىندە ۋنيۆەرسيتەتتىڭ جۇمىس بەرۋشىلەرمەن ءوزارا قارىم-قاتىناسى ءبىلىم بەرۋ  باعدارلامالارىنىڭ ساپاسىن جانە ستۋدەنتتەردىڭ پراكتيكالىق دايىندىعىن ارتتىرۋ ءۇشىن ماڭىزدى ەكەنىن اتاپ ءوتتى. سونىمەن قاتار, ول فورۋم يننوۆاتسيالىق تەحنولوگيالاردى, ميكروبىلىكتىلىكتەردى ەنگىزۋ جانە كاسىبي دايىندىقتى كۇشەيتۋ بويىنشا جاڭا شەشىمدەردى ىزدەۋدە ءتيىمدى الاڭ بولعانىنا توقتالدى.

پلەنارلىق وتىرىستا تاقىرىپقا وراي كەڭ اۋقىمداعى ماڭىزدى ماسەلەلەر قامتىلدى. اتاپ ايتساق, Huatec Information Technology Co., Ltd. (قىتاي) حالىقارالىق ءبىلىم بەرۋ جوسپارلاۋ ءبولىمىنىڭ ديرەكتورى توني سان «ءبىلىم بەرۋدى رەفورمالاۋ مەن بىلىكتىلىكتى ارتتىرۋداعى كوشباسشىلىق: يننوۆاتسيالىق تاجىريبەلەر مەن ءبىلىم بەرۋ تۇجىرىمدامالارى» اتتى بايانداماسىندا ءبىلىم بەرۋگە يننوۆاتسيالىق كوزقاراستار تۋرالى ايتتى. ال, «اتامەكەن» ۇكپ شاعىن كاسىپكەرلىكتى دامىتۋ جانە حالىقارالىق ىنتىماقتاستىق بويىنشا دامۋ جونىندەگى ديرەكتور ورىنباسارىنىڭ مىندەتىن اتقارۋشى تورەبەكوۆا جانار مەيرامقىزى «ەڭبەك نارىعىن قازىرگى زامانعى سىن-قاتەرلەرگە بەيىمدەۋدەگى شاعىن جانە ورتا بيزنەستىڭ ءرولى» تاقىرىبىندا ۋنيۆەرسيتەتتەر مەن بيزنەس ىنتىماقتاستىعىنىڭ قاجەتتىلىگىن اتاپ ءوتتى.

«اكادەمسەت» جشس باس ديرەكتورى تاكاباەۆ تاحير ماراتوۆيچ «قر ۋنيۆەرسيتەتتەرىندەگى IT-ارنايى ماماندىقتاردىڭ وندىرىستىك-تاجىريبەلىك بازاسىن دامىتۋ» جونىندە سويلەپ, IT-باعىتتاردى دامىتۋداعى تابىستى تاجىريبەلەرىمەن ءبولىستى. سۇلەيمان دەميرەل ۋنيۆەرسيتەتىنىڭ (تۇركيا) سىرتقى بايلانىستار دەپارتامەنتىنىڭ باسشىسى دوكتور يبراگيم كۋبيلاي «ۋنيۆەرسيتەت ءبىلىم بەرۋ, عىلىم مەن ونەركاسىپتى بىرىكتىرۋشى كوپىر رەتىندە» اتتى بايانداماسىندا ءارتۇرلى سالالاردى بىرىكتىرۋدە ۋنيۆەرسيتەتتەردىڭ ماڭىزدىلىعىنا توقتالدى. Global Korea Center ديرەكتورى حان دجين سون «قازاقستاننىڭ وڭدەۋ ونەركاسىبىنە ارنالعان ەكوجۇيە قۇرۋ جانە تسيفرلىق يندۋستريانى دامىتۋ» جايىندا وي قورتىپ, ميتۋ-مەن وزىق تەحنولوگيالاردى ەنگىزۋ بويىنشا ستراتەگيالىق سەرىكتەستىك تۋرالى ايتىپ بەردى.

فورۋمنىڭ ماڭىزدى وقيعاسى ميتۋ مەن بىرقاتار جەتەكشى كومپانيالار, ونىڭ ىشىندە «اقساي نان-توقاش كومبيناتى» جشس, «Goji» جشس, «IFC COLOC» جشس, «الماتىەنەرگوسبىت» جشس, «Byte Machine» جشس جانە باسقا دا ۇيىمدار اراسىندا ىنتىماقتاستىق تۋرالى كەلىسىمدەرگە قول قويۋ بولدى. كەلىسىمدەر ءبىلىم بەرۋ باعدارلامالارىن بىرلەسىپ ازىرلەۋدى, دۋالدى وقىتۋ جوبالارىن جۇزەگە اسىرۋدى جانە ستۋدەنتتەردىڭ عىلىمي-زەرتتەۋ جانە پراكتيكالىق قىزمەتكە قاتىسۋىن كوزدەيدى.

فورۋمنىڭ ەكىنشى بولىگىندە كادرلاردى دايارلاۋ باعىتتارى بويىنشا پانەلدىك سەسسيالار ءوتتى. وندا «بيوحيميالىق ينجەنەريا» — «ەكوسەرۆيس» جشس, «Goji» جشس, «لوتتە راحات» اق جانە باسقا دا ۇيىمدارمەن سەرىكتەستىك, «ەكونوميكا جانە بيزنەس» — «Kaspi Bank» اق, «اسسا Global Limited» جشس جانە باسقا دا ۇيىمدارمەن ىنتىماقتاستىق, «باعدارلامالىق ينجەنەريا» — قازاقستان بلوكچەين-تەحنولوگيالار قاۋىمداستىعىمەن جانە «MaxImagine» جشس-مەن ءوزارا ارەكەتتەسۋ, «ازىق-ت ۇلىك وندىرىستەرىنىڭ تەحنيكاسى مەن تەحنولوگيالارى» — «اقساي نان-توقاش كومبيناتى» جشس جانە «شين-لاين» جشس-مەن سەرىكتەستىك جايى قامتىلىپ, ناقتى كەلىسىمدەر جاسىلدى.

سەسسيالار بارىسىندا تەوريا مەن پراكتيكانى بىرىكتىرۋ, ميكروبىلىكتىلىكتەردى ەنگىزۋ جانە ءبىلىم بەرۋ باعدارلامالارىن بىرلەسىپ ازىرلەۋ ماسەلەلەرى تالقىلاندى. فورۋم ناتيجەسىندە وسىمدىكتەردى قورعاۋ سالاسىنداعى ماماندانۋلاردى قوسا العاندا, جەكە وقىتۋ تراەكتوريالارىن ازىرلەۋ تۋرالى شەشىم قابىلداندى. سونداي-اق جۇمىس بەرۋشى كاسىپورىندار عىلىمي تاعىلىمدامالار مەن وندىرىستىك پراكتيكانى وتكىزۋگە ىنتىماقتاستىق جاساۋعا دايىن ەكەندىكتەرىن ءبىلدىردى. جۇمىس بەرۋشىلەرمەن بىرلەسىپ ونلاين وقىتۋدى ەنگىزۋ جوبالارى جوسپارلاندى.

فورۋمنىڭ پراكتيكالىق ءبولىمى روبوتوتەحنيكالىق جۇيەلەر كورمەسىن جانە ستۋدەنتتەر ازىرلەگەن ءسۇت ونىمدەرىن دەگۋستاتسيالاۋدى قامتىدى. فورۋم ءبىلىم بەرۋ, عىلىم جانە بيزنەس ينتەگراتسياسىنىڭ سۇرانىسقا يە مامانداردى دايارلاۋداعى ماڭىزدىلىعىن راستادى جانە ءوزارا ءتيىمدى ىنتىماقتاستىق ءۇشىن جاڭا مۇمكىندىكتەر اشتى.