«جۇمىس ۋاقىتىن ءوزى رەتتەي الادى»: ەڭبەك ۆيتسە-ءمينيسترى بىرىڭعاي ۋاقىت بەلدەۋىن الىپ تاستاۋدىڭ قاجەتى جوق ەكەنىن ايتتى

فوتو: اشىق دەرەككوز

2 تامىزدا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس انافين قازاقستاننىڭ بىرىڭعاي ۋاقىت بەلدەۋىنە قارسى پەتيتسيانى قوعامدىق تالقىلاۋ بارىسىندا پىكىر ءبىلدىردى. بۇل تۋرالى Stan.kz اقپارات اگەنتتىگى حابارلايدى.

انافين ۋاقىت وزگەرىستەرىنە بەيىمدەلۋ ءۇشىن ەڭبەك كودەكسىندە جۇمىس ىستەۋگە مۇمكىندىك بەرەتىن نورمالار بار ەكەنىن اتاپ ءوتتى. سوزىنشە, ەڭبەك كودەكسىنىڭ 63-بابىنا سايكەس ەڭبەك ءتارتىبىن جۇمىس بەرۋشىنىڭ ءوزى رەتتەيدى.

«بۇل قاعيدالار جۇمىس, دەمالىس ۋاقىتىن, ەڭبەك ءتارتىبىن قامتاماسىز ەتۋ شارتتارىن جانە ەڭبەك قاتىناستارىن رەتتەيدى. ەڭبەك كودەكسىنىڭ 71-بابىنىڭ 5-تارماعىنا سايكەس, كۇندەلىكتى جۇمىستىڭ ۇزاقتىعى, دەمالىس, اۋىسىمنىڭ باستالۋ جانە اياقتالۋ ۋاقىتى, سونداي-اق ۋاقىت ۇزىلىستەرى ەڭبەك تارتىبىمەن جانە ۇجىمدىق ەڭبەك كەلىسىمىمەن بەلگىلەنەدى. وسىلايشا, جۇمىس بەرۋشىلەر مەن قىزمەتكەرلەردە جۇمىس ۋاقىتىن يكەمدى رەتتەۋ تەتىكتەرى بار», – دەدى انافين.

ول قازىرگى نورمالار قازىردىڭ وزىندە ۋاقىت بەلدەۋلەرىن وزگەرتپەي-اق باسقا ۋاقىتقا بەيىمدەلۋگە مۇمكىندىك بەرەتىنىن اتاپ ءوتتى.

ەسكە سالايىق, 1 ناۋرىزدا قازاقستاننىڭ بارلىق ايماعى ءبىر ۋاقىت بەلدەۋىنە اۋىستى. الايدا بىرىڭعاي ۋاقىت بەلدەۋىنە كوشكەننەن كەيىن قازاقستاندىقتار جارىققا كوپ شىعىندالاتىن بولدى. ناۋرىزدا ەل تۇرعىندارى اقپان ايىمەن سالىستىرعاندا ەلەكتر ەنەرگياسىن 364 ملن كۆت/ساعات ارتىق پايدالانعان.

بۇعان دەيىن بىرىڭعاي ۋاقىت بەلدەۋىنە قارسى پەتيتسيا 50 مىڭ قول جيناعانى تۋرالى جازعان ەدىك. ال مينيسترلىك بىرىڭعاي ۋاقىت بەلدەۋىنە قارسى پەتيتسيانى قاناعاتتاندىرماي قويدى.