جاڭالىقتار
«جۇمىسقا كىرگەنىنە 10-اق كۇن بولعان»: ءۇرجاردا قاتىگەزدىكپەن ولتىرىلگەن جىگىت جايلى تىڭ دەرەك ايتىلدى
فوتو: اشىق دەرەككوز
مارقۇمنىڭ تۋىسىنىڭ ايتۋىنشا, ونىڭ كوز جۇمعان باۋىرى دا, ونى ءولتىردى دەگەن كۇدىكپەن ۇستالعان كۇدىكتى تە اۋداندىق كوميسسارياتتا جۇمىس ىستەگەن. ونىڭ ۇستىنە كوز جۇمعان جىگىتتىڭ جۇمىسقا كىرگەنىنە بار-جوعى 10 كۇن عانا بولعان. اقپاراتتى مارقۇمنىڭ اپكەسى راستادى, دەپ حابارلايدى qandastar.kz Qaz365.kz-كە سىلتەمە جاساپ.
ەسكە سالا كەتەيىك, بۇعان دەيىن رەداكتسيامىز اباي وبلىسى ءۇرجار اۋدانى ءۇرجار اۋىلىندا 2001 جىلى تۋعان ازاماتتى اياۋسىز, 11 جەرىنەن پىشاقتاپ ءولتىرىپ كەتكەنىن جازعان ەدى. وقيعا 30 قاڭتاردا تۇندە بولعان. بەيرەسمي اقپاراتقا قاراعاندا, كۇدىكتى اۋداندىق اسكەري كوميسسارياتتا جۇرگىزۋشى بولىپ جۇمىس ىستەگەن. وبلىستىق پوليتسيا دەپارتامەنتى كىسى ءولتىردى دەگەن ايىپپەن ءبىر ادامنىڭ ۇستالعانىن راستاعان بولاتىن.
سونداي-اق ۋاتساپ الەۋمەتتىك جەلىسىندە دە كىسى ءولتىردى دەگەن جىگىتتىڭ اسكەري كوميسسارياتتا جۇرگىزۋشى بولىپ جۇمىس ىستەيتىنى جونىندە بەيرەسمي اقپارات تارادى. الايدا قورعانىس مينيسترلىگىنىڭ وكىلى رۋسلان جانگۋلين رەداكتسيامىزعا بەرگەن جاۋابىندا كۇدىكتىنىڭ اسكەري كوميسساريات قىزمەتكەرى ەكەنىن جوققا شىعارعان ەدى. https://qaz365.kz/incidents/6282-bauyzdap-kozine-deiin-pyshak-sug-yp-ketken-urzharda-22-zhastagy-zhigitti-oltirip-ketti/
بۇگىن Qaz365.kz تىلشىسى مارقۇمنىڭ اپكەسىمەن سويلەسىپ, كوز جۇمعان جىگىتتىڭ دە, كۇدىكتىنىڭ دە ءبىر جۇمىس ورنىندا – اسكەري كوميسسارياتتا جۇمىس ىستەگەنىن راستادى.
«ونىڭ (كوز جۇمعان جىگىتتىڭ) اسكەري كوميسسارياتتا جۇمىسقا كىرگەنىنە 10-اق كۇن بولىپ ەدى. ءوزى اسكەري كافەدرانى بىتىرگەن. ماماندىعى تەحنولوگ بولاتىن. ءالى ەس جيناعان جوقپىز. ولار بىرگە جۇمىس ىستەگەن. بىرگە جۇرگەن. مەن قازىر ەشتەڭە دەپ ايتا المايمىن. قازىر ەسىمىزدى ەندى جيىپ جاتىرمىز», – دەيدى مارقۇمنىڭ اپكەسى شولپان.
قورعانىس مينيسترلىگىنىڭ رەسمي وكىلى رۋسلان جانگۋليننەن تۋىستارىنىڭ سوزىنە قاراماستان, نە سەبەپتى ەكەۋىنىڭ دە اسكەري كوميسسارياتتا ىستەگەنىن جاسىرعانىن سۇراعانبىز. ول رەسمي حات جولداۋدى سۇراپ, قىسقا قايىردى.
Qaz365.kz بۇل وقيعانىڭ ءمان-جايىن, جاي-جاپسارىن نازارىندا ۇستايدى.
