جۇمىسشى ماماندىقتار جىلى: ەلوردادا قانداي ءىس-شارالار وتەدى?

فوتو: اشىق دەرەككوز

ەلوردادا 2025 جىلى جۇمىسشى ماماندىقتار جىلى اياسىندا جۇمىسشى ماماندىقتارىنىڭ بەدەلىن ارتتىرۋعا جانە جاستاردى قالا ەكونوميكاسىنىڭ ناقتى سەكتورىنا تارتۋعا باعىتتالعان بىرقاتار ماڭىزدى ءىس-شارالار وتەدى. بۇل تۋرالى استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ مالىمدەدى, دەپ حابارلايدى qandastar.kz

باستى وقيعالاردىڭ ءبىرى «WorldSkills», «JasSkills» جانە «DeafSkills» فورماتتارىنداعى قالالىق كاسىبي شەبەرلىك چەمپيوناتى بولماق. ەلوردانىڭ كوللەدجدەرى مەن جوعارى وقۋ ورىندارىندا ورنالاسقان 15 الاڭدا 49 قۇزىرەت بويىنشا 500-دەن استام ادام قاتىسادى دەپ كۇتىلۋدە. جىل سايىن قاتىسۋشىلار سانى ارتىپ كەلەدى, اسىرەسە مەكتەپ وقۋشىلارى مەن مۇمكىندىگى شەكتەۋلى جاندار اراسىندا بايقالادى. چەمپيونات جەڭىمپازدارى وسى جىلدىڭ كۇزىندە وتەتىن ۇلتتىق چەمپيوناتقا قاتىسۋعا مۇمكىندىك الادى.

سونىمەن قاتار, 2025 جىلى كوللەدجدەر بازاسىندا 10-11 سىنىپ وقۋشىلارىن وقىتۋ جوباسىن كەڭەيتۋ جالعاسادى. ورتا مەكتەپ وقۋشىلارى تىگىنشى, ناۋبايشى, اسپاز, شاشتاراز, فلوريست, جيھاز ءوندىرىسىنىڭ مامانى جانە ەلەكتر گازدى دانەكەرلەۋشى سياقتى كاسىپتىڭ بىرەۋىن تاڭداپ, پراكتيكالىق داعدىلار مەن جۇمىس بىلىكتىلىگىن الا الادى. كۋرستار اياقتالعاننان كەيىن وقۋشىلار اتتەستات پەن بىلىكتىلىك تۋرالى كۋالىك الادى.

كاسىپتىك باعدار بەرۋ جۇمىسى شەڭبەرىندە قالانىڭ 100 مەكتەبىندە ەكونوميكانىڭ ءتۇرلى سالالارىنا باعدارلانعان بەيىندىك سىنىپتار اشىلاتىن بولادى. 40 پەداگوگيكالىق, 10 مەديتسينالىق, 10 تىگىن, 10 سەرۆيس جانە 10 ديزاين بويىنشا سىنىپ قۇرۋ جوسپارلانۋدا. بۇل سىنىپتار ۋنيۆەرسيتەتتەرمەن جانە كوللەدجدەرمەن بىرلەسىپ, تۇراقتى كاسىپتىك باعدار بەرۋ ءىس-شارالارىن جۇرگىزەدى.

ماڭىزدى باعىتتاردىڭ ءبىرى كوللەدجدەردى ينتەرناتسيونالداندىرۋ, شەتەلدىك ءبىلىم بەرۋ مەكەمەلەرىمەن كەلىسىمدەر جاساسۋ بولادى. سينگاپۋر, فرانتسيا جانە تۇركيا كوللەدجدەرىمەن ىنتىماقتاستىق تۋرالى مەموراندۋمدارعا قول قويىلدى. وسى كەلىسىمدەر شەڭبەرىندە وقىتۋشىلار مەن ستۋدەنتتەر اراسىندا تاجىريبە الماسۋ داميتىن بولادى.

جۇمىسشى ماماندىقتار جىلى اياسىندا كوللەدجدەر بازاسىندا جاڭا رەسۋرستىق ورتالىقتار اشۋ جوسپارلانۋدا. بۇل ورتالىقتار پراكتيكالىق وقىتۋ ءۇشىن زاماناۋي ءبىلىم بەرۋ باعدارلامالارىمەن جانە جابدىقتارمەن جابدىقتالادى, سونداي-اق جۇمىس بىلىكتىلىگى بويىنشا قىسقا مەرزىمدى كۋرستار وتكىزەدى. ول ءۇشىن 90-نان استام وقۋ باعدارلاماسى ازىرلەندى.

تەحنيكالىق جانە كاسىپتىك ءبىلىم بەرۋدىڭ تارتىمدىلىعىن ارتتىرۋ ءۇشىن استانادا جەكە ينۆەستيتسيالار مەن جەرگىلىكتى بيۋدجەت قاراجاتىن تارتا وتىرىپ, كوللەدجدەردىڭ ماتەريالدىق-تەحنيكالىق بازاسى جاڭعىرتىلاتىن بولادى. 2025 جىلى كوللەدج ستۋدەنتتەرىنە ارنالعان 1000 ورىندىق جاتاقحانا سالۋ جوسپارلانعان, بۇل ورىن تاپشىلىعىن شەشۋگە كومەكتەسەدى.

كوللەدجدەردى حالىقارالىق سەرتيفيكاتتاۋعا ەرەكشە نازار اۋدارىلاتىن بولادى. قوعامدىق تاماقتانۋ جانە سەرۆيس كوللەدجدەرى, » ASTANA POLYTECHNIC «جانە تەحنولوگيالىق كوللەدجى» Richemont » (شۆەيتساريا) جانە City & GUILDS ( ۇلىبريتانيا) سياقتى حالىقارالىق ۇيىمدارمەن ىنتىماقتاسادى, بۇل ولاردىڭ تۇلەكتەرىنىڭ الەمدىك ەڭبەك نارىعىندا باسەكەگە قابىلەتتىلىگىن ارتتىرادى.

جۇمىسشى كاسىپتەرىن دامىتۋداعى ماڭىزدى قادام جۇمىس بەرۋشىلەردىڭ كادرلار دايارلاۋعا قاتىسۋىن كەڭەيتۋ بولادى. كاسىپورىنداردى وقىتۋشىلاردىڭ تاعىلىمدامالارىنا قوسۋ جانە قالانىڭ 200 جۇمىس بەرۋشىسى قاتىساتىن «Professional Communication»جۇمىس بەرۋشىلەر فورۋمىن ۇيىمداستىرۋ بيزنەس پەن ءبىلىم بەرۋ مەكەمەلەرى اراسىنداعى ارىپتەستىك بايلانىستاردى نىعايتۋعا كومەكتەسەدى.

جۇمىسشى ماماندىقتار جىلى اياسىندا استانادا جۇمىسشى ماماندىقتاردى ىلگەرىلەتۋ بويىنشا بىرقاتار حالىقارالىق, رەسپۋبليكالىق جانە قالالىق ءىس-شارالار وتەدى. اسپازدىق, تىگىن, گاسترونوميا بويىنشا چەمپيوناتتار, شىعارماشىلىق بايقاۋلار, سپورتتىق جارىستار جانە «AstauFest-2025» سياقتى فەستيۆالدار الەمنىڭ تۇكپىر-تۇكپىرىنەن قاتىسۋشىلاردى تارتادى.

سونداي-اق, كوممۋنالدىق قىزمەتكەرلەر اراسىندا قالالىق فۋتبول ءتۋرنيرى, تەمىرجولشىلار اراسىندا ۇلتتىق ويىندار چەمپيوناتى جانە سپارتاكيادا سياقتى مادەني جانە سپورتتىق ءىس-شارالاردى وتكىزۋ جوسپارلانعان. بۇل وقيعالار ەكونوميكا مەن الەۋمەتتىك سالانىڭ ءارتۇرلى سەكتورلارى اراسىنداعى كورپوراتيۆتىك مادەنيەت پەن ءوزارا تۇسىنىستىكتى نىعايتۋعا ىقپال ەتەدى.