Jumysshy mamandyqtary jylynda qandaı jańashyldyq oryn almaq

Foto: Úkimet

Úkimette Memleket basshysynyń bastamasymen qolǵa alynǵan Jumysshy mamandyqtary jyly aıasynda tehnıkalyq mamandardy qoldaý sharalaryn qabyldanýda, dep jazady qandastar.kz

Premer-Mınıstr Oljas Bektenovtiń tapsyrmasymen Otbasy Banki «Naýryz jumysker» jańa baǵdarlamasy iske qosylǵany týraly jarııalanyp, jumysshy mamandardy baspanamen qamtý máselesi sheshildi.

Baǵdarlama ónerkásip, energetıka, kólik, aýyl sharýashylyǵy jáne sý resýrstary salalary qyzmetkerlerin qamtıdy.

Bıyl «Naýryz jumysker» baǵdarlamasy aıasynda jumysshy mamandyqtary ókilderine 72 mlrd teńge kóleminde 2 440 nesıe berý josparlanyp otyr.

О́tinimderdi qabyldaýdyń bastalýy 2025 jyldyń 17 naýryzyna josparlanǵan. «Naýryz jumysker» qazirdiń ózinde belgili «Naýryz» turǵyn úı baǵdarlamasynyń bir bóligi bolmaq.

Baǵdarlama talaptary boıynsha azamattardyń áleýmettik osal sanattary úshin 7% (JTSM 7,1%-dan 9,6%-ǵa deıin) jáne qalǵan barlyq sanattar úshin 9%-dyq (JTSM 9,4%-dan 13%-ǵa deıin) mólsherlememen nesıe beriledi. Bastapqy jarna – taza árleýdegi bastapqy turǵyn úıdi satyp alý úshin 10%-dan, árlenbegen bastapqy turǵyn úıdi jáne qaıtalama naryqtaǵy turǵyn úıdi satyp alý úshin 20%-dan bastalady. Nesıeniń eń joǵary somasy oblystar úshin 30 mln teńge, Astana men Almaty qalalary úshin 36 mln teńge.

Sondaı-aq «Naýryz jumysker» baǵdarlamasymen qatar Otbasy banki otandyq kásiporyndarmen «korporatıvtik» ónim sheńberinde jumys isteıtin bolady, bul kásiporyndardyń óz qyzmetkerlerine nesıe berý úshin qarajat bólýin bildiredi.

«Prezıdentimiz 2025 jyldy Jumysshy mamandyqtary jyly dep jarııalady. Kenshiler, metallýrgter, tas qalaýshylar, elektrıkter quıýshylar aýyr jumystardy atqarady. Osy jáne basqa da kóptegen mamandyq ıeleri bizdi negizgi qajettiligimizdi qamtamasyz etip otyr. Mundaı mamandarǵa jasalǵan qamqorlyq – búkil qoǵamnyń ıgiligi úshin jasalǵan qamqorlyqpen teń. Kópshiligi qıyn jaǵdaıda jumys isteıdi. Sondyqtan olardyń baspana máselesin sheshý – qıyn eńbek jaǵdaılarynyń ornyn toltyrýǵa septigin tıgizedi», — dedi «Otbasy banki» AQ basqarma tóraǵasy Lázzat Ibragımova.