جاڭالىقتار
جۇمىسسىزدارعا سالىق سالۋ ۇسىنىلدى
رەسەيدە جۇمىسسىز ازاماتتار تولەيتىن مىندەتتى تولەم ەنگىزۋ ۇسىنىلدى. رەسەي فەدەراتسياسى ۇكىمەتىنىڭ جانىنداعى قارجى ۋنيۆەرسيتەتى ماماندارىنىڭ پىكىرىنشە, جۇمىسسىزدار اي سايىن 2 900 رۋبل كولەمىندە مىندەتتى مەديتسينالىق ساقتاندىرۋ قورىنا جارنااۋدارۋعا ءتيىس, دەپ حابارلايدى qandastar.kz سايتى.
بۇل باستاما جالعا بەرۋدەن پايدا تاباتىن ازاماتتارعا, اۋقاتتى اتا-انالاردىڭ بالالارىنا, ءۇي شارۋاسىنداعى ايەلدەرگە جانە رەسمي جۇمىسسىزدارعا قاتىستى بولماق.
مامانداردىڭ ايتۋىنشا, مۇنداي ازاماتتار دا قوعامدىق يگىلىكتەردى – جولداردى, مەديتسينا مەكەمەلەرىن پايدالانادى, الايدا ولار مەملەكەتكە تىكەلەي سالىق تولەمەيدى. سوندىقتان ولار دا ەلدىڭ الەۋمەتتىك شىعىندارىن قارجىلاندىرۋعا قاتىسۋعا ءتيىس دەپ ەسەپتەيدى.
قازىر بۇل باستاما تەك ۇسىنىس ساتىسىندا. قوعامدا ءتۇرلى پىكىر تۋعىزىپ ۇلگەرگەن يدەيا زاڭنامالىق باستاماعا اينالا ما – ونى ۋاقىت كورسەتەدى.
