«Jumysta jan tapsyrsa..»: Qytaıda kóp jumys isteıtinderge arnalǵan saqtandyrý júıesi paıda boldy

Qytaıda kóp jumys istep, zoryqqannan qaıtys bolǵan jaǵdaıda onyń otbasyna tólem jasaıtyn erekshe saqtandyrý polısi usynyldy. Polıs boıynsha tólem mólsheri – 600 myń ıýan, dep jazdy qandastar.kz aikyn.kz-ke silteme jasap.

Saqtandyrý polısiniń ataýynyń ózi kóp nárseni ańǵartady – «996». Bul ataý Qytaıdaǵy keń taralǵan jumys kestesin bildiredi: tańǵy 9-dan keshki 9-ǵa deıin, aptasyna 6 kún jumys isteý.

Saqtandyrý kompanııalary mundaı polısti usynýǵa Qytaıda eńbek mádenıetiniń erekshelikteri sebep bolǵanyn aıtady. Ásirese, IT salasynda jáne startaptarda «996» jumys tártibi qalypty jaǵdaıǵa aınalǵan. Mundaı qarqyndy jumys adamnyń densaýlyǵyna keri áserin tıgizip, stresstiń joǵary deńgeıine jáne shamadan tys sharshaýǵa ákeledi.

Polıs tek jumys ornynda qatty sharshaý nemese jumystan týyndaǵan densaýlyq máselelerinen qaıtys bolǵan jaǵdaılardy qamtıdy. Bul saqtandyrý qytaılyq eńbekqorlar men olardyń otbasylaryna belgili bir qarjylyq qaýipsizdik beredi.

Sarapshylar mundaı saqtandyrýdyń paıda bolýyn ekijaqty baǵalap otyr. Bir jaǵynan, bul polıs eńbekqor qyzmetkerlerdiń otbasylaryna qarjylyq kómek kórsetýge baǵyttalǵan. Ekinshi jaǵynan, bul saıasat jumys berýshilerdiń qyzmetkerlerdiń densaýlyǵyna degen jaýapkershiligin tómendetýi múmkin degen syn da aıtylýda.

Qytaıda «996» jumys kestesi kópshiliktiń talqylaýyna jıi túsedi. 2019 jyly bul taqyryp qoǵamda qyzý talqylanǵan edi. Keıbireýler mundaı rejımdi eldiń ekonomıkalyq tabysynyń kepili dese, basqalary ony adam quqyqtaryn shekteıtin júıe dep sanaıdy.

Jalpy, bul saqtandyrý – eńbek mádenıetiniń jańa tendenııalaryna ıkemdelgen erekshe qarjylyq ónimniń mysaly.