الەم جاڭالىقتارى
«جۇرەگىم اۋىردى»: جۋرناليست جاپونياداعى EXPO كورمەسىندەگى قازاقستاننىڭ پاۆيلونىن سىنعا الدى
فوتو: ۆيدەودان سكرين
ەلىمىزدىڭ پاۆيلونى تىم جۇپىنى ەكەنىن مالىمدەدى.
«ءبىزدىڭ ءومىرىمىز ءۇشىن بولاشاق قوعامىن قۇرۋ» اتتى كورمەگە الەمنىڭ 158 ەلى مەن 9 حالىقارالىق ۇيىمى قاتىسىپ جاتىر, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.
اعىمداعى جىلدىڭ 13 ءساۋىر-13 قازان ارالىعىندا وتەتىن جاھاندىق كورمەدە قازاقستاننىڭ پاۆيلونى دا ورنالاسقان. الايدا, جۋرناليست اينۇر اسانبەردى ەلىمىزدىڭ پاۆيلونى تىم جۇپىنى ەكەنىن مالىمدەدى.
“وساكا. EXPO 2025. قازاقستان پاۆيلونى. جۇرەگىم اۋىردى… بۇكىل الەم بولاشاقپەن تىنىستاپ جاتىر. امەريكالىقتار — ايعا ءۇي سالامىز دەيدى. نەمىستەر — ۇشاتىن كولىكپەن كەلەدى. جاپوندار — روبوت پەن رۋحتى بىرىكتىرىپ وتىر. تۇركىمەنستان مەن ءازىربايجاننىڭ جەكە عيماراتى, وزىندىك ءستيلى, ايتارى بار. ال ءبىز… جارتىلاي كيىز ءۇي. جارتىلاي ۇيات. جارتىلاي قاتىسۋ. جارتىلاي ەل ەكەنىمىزدى تانىتقانداي… ۇلت بولمىسىن تانىتۋدىڭ ورنىنا, بۇرىشتاعى قاراپايىم دەكوراتسياعا اينالىپ قالعاندايمىز. تۇسىنەم, قاراپايىمدىق – قاسيەت. بىراق مۇنداي اۋقىمدى ساحنادا بۇلاي پوزور بولعانشا ەشتەڭە قويماعان ءجون بە ەدى. جارايدى قويعان ەكەنبىز, قانشاما ادام سول ەكسپو ءۇشىن جارتى جىلعا جاپونياعا كەلدى. سولار ەڭ بولماسا ادەمىلەپ اقپارات بەرىپ شىعارىپ سالسا عوي شىركىن… سونشا ىزدەپ بارىپ ءوز ەلىمنىڭ كۇيىنە قاراپ كوڭىل قۇلازىدى… ءتىپتى قارسى الىپ تۇرعان جىگىت ەشكىمدى جاقتىرىپ تۇرعان جوق”, — دەيدى ول جەلىدەگى پاراقشاسىندا.
سونداي-اق, جۋرناليست كۇنشىعىس ەلىنە قازاقستاننىڭ پاۆيلونىن اپارعان جاۋاپتىلاردى جەرگىلىكتى بارلاردان ءجيى كورەتىنىن دە جاسىرمادى.
“ماقساتىم ەلىمىزدى سىناۋ ەمەس. تەك وسى كورمەنىڭ سوڭىندا 10 ادام ءجۇر. ءبارىن وساكادا باردا سىرا ءىشىپ وتىرعاندارىن كوردىم. مىنا جەرگە كەلگەندەردى كۇتىپ الىپ ەشتەڭە قويماسا دا اقپارات بەرسە دەگەن وي عانا”, — دەپ جازدى ول Instagram stories-تە.
