“Júregime syımaı júr“. Bıshimbaev isinen keıin tanylǵan prokýror ókinishin jetkizdi

Foto: Tengrinews.kz skrınshoty

Eks-mınıstr Qýandyq Bıshimbaev isi boıynsha memlekettik aıyptaýshy bolǵan Aıjan Aımaǵanova oqyrmandaryna jan syryn aqtardy – dep habarlaıdy Massaget.kz tilshisi.

Prokýror eshqashan tanymal bolýǵa tyryspaǵanyn aıtty.

«Kesh jaryq! Kóp nárseni, kóńildegini sizderge shyǵaraıyn dep edim, júregime syımaı júr. Osy jarty jylda ómirge degen kózqarasym túbegeıli ózgerdi – men kópshilikke tanymal boldym. Osy jaǵdaı meni qynjyltady. Shynynda, men kópshilikke tanymal bolýǵa eshqashan tyrysqan emespin, ol úshin janymdy salyp, jarqyrap júrýge eshqandaı qumarym da, qulqym da joq. Áli kúnge deıin suhbatqa, kópshilik aldynda sóıleýge shaqyratyn jerler kóp. Biraq men bas tartamyn. Alaıda budan eshqaıda qasha almaıtyn sekildimin. Abaı aıtqandaı, «ózińde barmen kózge uryp, artylam deme ózgeden». Biraq ómir óz erejelerimen júrgizedi eken», – dep jazdy ol.

Memlekettik aıyptaýshy odan kómek suraıtyn adamdar bar ekenin, alaıda bárine birdeı kómektese almaı jatqanyn jetkizdi.

«Osy tanystyqtyń arqasynda kómek suraǵandar da bar, bireýlerine shama jetip jatsa, kómektesip júrmin, biraq ókinishke qaraı, kómek bere almaı jatqan jaǵdaı da bar. Shama jetpeıdi, ol maǵan da ońaı tımeıdi. Árıne, bárimizdiń kózqarasymyz ártúrli, bárimizdi biriktiretin nárse – adam bolýǵa umtylys. Jazba jazbaı turyp, kóp tolǵanamyn, oılanamyn, óz-ózimdi synaımyn, sizderden syndy qabyl alamyn. Biraq shynymdy aıtsam, jazba jazyp, masattana qoımaımyn. Bardy bardaı, joqty joqtaı qabyldaýdy ómir ózi úıretti», – deıdi Aıjan Aımaǵanova.

Eske salaıyq, azamattyq nekedegi áıeli Saltanat Núkenovany asa qatygezdikpen óltirdi degen aıyppen sottalǵan eks-mınıstr Qýandyq Bıshimbaevqa qatysty iste memlekettik aıyptaýshy Aıjan Aımaǵanova boldy. Bul sot otyrystarynan jelide úzindi vıdeolar tarap, prokýror óz batyldyǵymen jeli qoldanýshylary arasynda tanymaldylyqqa ıe boldy.