«جۇرەگىمىزگە اۋىر ءتيدى»: اينۇر تۇرسىنباەۆانىڭ كۇيەۋى 20 جىلعا سوتتالعان ارمان جۇماگەلديەۆكە قولداۋ ءبىلدىردى

فوتو: https://www.instagram.com/aidyn_nury/

ايتىسكەر اقىن اينۇر تۇرسىنباەۆانىڭ كۇيەۋى قاڭتار وقيعاسىنا قاتىسىپ, 20 جىلعا سوتتالعان ارمان جۇماگەلديەۆكە قولداۋ ءبىلدىردى. بۇل تۋرالى  qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

اقىننىڭ كۇيەۋى نۇرجان يماناليەۆ – ءىستى بولعان ارمان جۇماگەلديەۆتىڭ سەنىمدى سەرىگى.

“بۇگىن ارمان باۋىرىمىزعا جانە ونىڭ جانىنداعى باۋىرلارىمىزعا قاتىستى قاتاڭ ۇكىم شىقتى. بۇل جۇرەگىمىزگە اۋىر تيسە دە, ءبىز مۇسىلمان رەتىندە اللا تاعالانىڭ سىناقتارىنا سابىر ەتىپ, ءار نارسەنىڭ حيكمەتىن تۇسىنۋگە تىرىسامىز. اللا تاعالا جۇرەگىمىزگە سابىر بەرىپ, بۇل قيىنشىلىقتى جەڭۋگە كۇش-قۋات ءناسىپ ەتسىن! سابىر – مۇسىلماننىڭ ەڭ اسەم قاسيەتتەرىنىڭ ءبىرى. ارمان باۋىرىمىز بەن ونىڭ وتباسىنا بۇل سىناق ۇلكەن ەمتيحان ەكەنى ءسوزسىز. بىراق ءار قيىندىقتىڭ ارتىندا جەڭىلدىك بار ەكەنىن ۇمىتپايىق. بۇل ساتتە ءبىز باۋىرلارىمىزعا قولداۋ كورسەتىپ قانا قويماي, دۇعادا بولۋىمىز كەرەك. اللا تاعالا بارلىعىمىزعا سابىر مەن يمان بەرسىن, بۇل سىناقتىڭ اقىرىن جاقسىلىققا اينالدىرسىن. ارمان باۋىرىمىز بەن ونىڭ وتباسىنا اللانىڭ مەيىرىمى جاۋىپ, جۇرەكتەرىنە تىنىشتىق ءناسىپ ەتكەي”, – دەپ جازدى نۇرجان.

ەسكە سالايىق, ارمان جۇماگەلديەۆ پەن ونىڭ جاقتاستارىنا شىققان سوت ۇكىمىنىڭ ەگجەي-تەگجەيى ايتىلعانىن جازعان ەدىك.

الماتىدا ارمان جۇماگەلديەۆتىڭ قىلمىستىق توبى, جاپپاي تارتىپسىزدىك ۇيىمداستىرعانى جانە ازاماتتاردى ۇرلاعانى ءۇشىن سوتتالدى.

سوت مالىمەتىنشە, 2016 جىلى ۇلتتىق قاۋىپسىزدىك كوميتەتى 5-دەپارتامەنتى باسشىسىنىڭ ورىنباسارى رۋسلان يسكاكوۆ ۇلتتىق قاۋىپسىزدىك ورگاندارىنىڭ قولداۋىنا كەپىلدىك بەرەتىنىن ايتقان. وسىلايشا جۇماگەلديەۆتى سەرىكتەستىككە كوندىرگەن.