«جۇرەك ەلجىرەيدى»: قازاق سپورتشىسىنا قۇرمەت كورسەتكەن قىرعىز بالاسى ەلدى ءسۇيسىنتتى

جەلىدە قىرعىز رەسپۋبليكاسىندا وتكەن حالىقارالىق سپورت فەستيۆالىندە جەڭىس تۇعىرىنا كوتەرىلگەن بالالاردى ارەكەتى قىزۋ تالقىلانىپ جاتىر, دەپ حابارلايدى Qandastar.kz اقپارات پورتالى.

ۆيدەودا ءبىرىنشى ورىن يەلەنگەن قازاق بالاسىنا قىرعىز سپورتشىسى قۇرمەت كورسەتكەن ءسات تاسپالانعان. ول سايىستا ءبىرىنشى ورىن العان قازاقستاندىق دوسىنا باس كيىمىن شەشىپ, سىيعا تارتقان. بۇعان جاۋاپ رەتىندە جەڭىمپاز سپورتشى دا قازاقستان تۋى بەينەلەگەن باس كيىمىن تارتۋ ەتتى. كەيىن ەكەۋى ءبىرىن-ءبىرى قۇشاقتاپ, دوستىق پەن تاتۋلىقتىڭ ۇلگىسىن كورسەتتى.

مۇنى كورگەن جەلى قولدانۋشىلارى «وسىنداي كورىنىستەردەن كوز دەمالىپ, جۇرەك ەلجىرەيدى», «ءتىفاي, ءتىفاي, جاس ۇرپاق اقىلدى», «قانداي كەرەمەت?! ءاردايىم وسىلاي تاتۋ بولىپ جۇرەيىك», «جارايسىڭدار, بولاشاق باتىرلار!», «دوستىعىمىز ماڭگى بولسىن», «وسى ەكى جاس ءبۇلدىرشىننىڭ باۋىرمالدىعىن كوكپارشىلارعا بەرسىن» دەپ جازدى.