جۋرناليست دانيار ادىلبەكوۆ سوتتا «بيشىمباەۆتى قولداۋدى» ۇسىنعان ادامنىڭ اتى-ءجونىن ايتتى

فوتو: اشىق دەرەككوز

جۋرناليست دانيار ادىلبەكوۆ, بۇرىنعى ۇلتتىق ەكونوميكا ءمينيسترى قۋاندىق بيشىمباەۆتى قولداپ ءسوز سويلەۋگە شاقىرعان ادامنىڭ اتىن اتادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

ادىلبەكوۆكە «ديكي وردا» Telegram-ارناسىندا «بيشىمباەۆتىڭ بۇلب ۇلى» جانە «بيشىمباەۆتىڭ شابارماندارى شۇڭقىرىنا تىعىلدى» تاقىرىپتارىمەن ماقالا جازىپ, جالعان اقپارات تاراتتى دەگەن ايىپ تاعىلىپ وتىر. ماقالادا ول سول كەزدە ايەلى نۇكەنوۆانى ءولتىردى دەپ ايىپتالعان بيشىمباەۆتى اقتاۋ ناۋقانى اياسىندا مەديامەنەدجەرلەر مەن بلوگەرلەردىڭ العان سوماسى مەن اتى-ءجونىن جازعان.

وسى جازبادا اتى اتالعان «Elmedia» جوباسىنىڭ جەتەكشىسى گۇلجان ەرعاليەۆا ءوزى تۋرالى كورىنەۋ جالعان اقپارات تاراتقانى تۋرالى ارىزبەن قۇقىق قورعاۋ ورگاندارىنا حابارلاسقان.

ادىلبەكوۆ Telegram-ارناسىندا جازعان اقپاراتتى ساياساتتانۋشى امان مامبەتاليەۆپەن جەكە كەزدەسۋىندە بىلگەنىن, ول ءوزىن ەكس-ءمينيستردى اقتاۋ ىسىنە قاتىسۋعا شاقىرعانىن ايتتى.

«ماعان بيشىمباەۆتى قولداۋ ۇسىنىسىمەن مامبەتاليەۆ جۇگىندى», – دەدى جۋرناليست سوتتا.

الايدا مامبەتاليەۆ مۇنى جوققا شىعارىپ وتىر. ول قۋاندىق بيشىمباەۆتى دا, ونىڭ تۋىستارىن دا تانىمايمىن دەيدى.

«بيشىمباەۆتىڭ قولدايتىن ناۋقانعا قاتىسپادىم. ءجۋرناليستىڭ قانداي ماقساتتا بۇلاي دەگەنىن بىلمەيمىن. مۇمكىن ءوزىن قورعاعىسى كەلگەن شىعار. وكىنىشكە قاراي, ونىڭ نە سەبەپتى بۇلاي دەگەنىن بىلمەيمىن», – دەدى ساياساتتانۋشى.

سوتتالۋشى ولاردىڭ كەزدەسۋى 2024 جىلدىڭ اقپان ايىندا دوستىق كوشەسىندەگى استانالىق ءدامحانادا بولعانىن جەتكىزدى. الايدا, كۋاگەر ونىمەن كەزدەسپەگەنىن ايتىپ وتىر.

وسىعان بايلانىستى ادىلبەكوۆ سۋديادان «مامبەتاليەۆتىڭ ەستە ساقتاۋ قابىلەتى ناشار بولعاندىقتان» وعان تەلەفون سوعۋدى سۇرادى.

«ول قازىر مۇنىڭ ءبارىن بىلمەيتىن ادامنىڭ كەيپىن جاساپ وتىر», – دەدى سوتتالۋشى.

ايتا كەتەيىك, بۇعان دەيىن 2024 جىلى ءساۋىر ايىندا جۋرناليست دانيار ادىلبەكوۆ قاماۋعا الىنعان ەدى. ىشكى ىستەر ءمينيسترىنىڭ ورىنباسارى مارات قوجاەۆ جۋرناليست ولاردىڭ ءبىرىن جەمقورلىق جاسادى دەپ جالعان ايىپتاعانىن جەتكىزگەن ەدى.