Jýrnalıst Danııar Ádilbekov sotta «Bıshimbaevty qoldaýdy» usynǵan adamnyń aty-jónin aıtty

Foto: ashyq derekkóz

Jýrnalıst Danııar Ádilbekov, burynǵy ulttyq ekonomıka mınıstri Qýandyq Bıshimbaevty qoldap sóz sóıleýge shaqyrǵan adamnyń atyn atady. Bul týraly qandastar.kz Stan.kz aqparat agenttigine silteme jasap habarlaıdy.

Ádilbekovke «Dıkıı Orda» Telegram-arnasynda «Bıshimbaevtyń bulbuly» jáne «Bıshimbaevtyń shabarmandary shuńqyryna tyǵyldy» taqyryptarymen maqala jazyp, jalǵan aqparat taratty degen aıyp taǵylyp otyr. Maqalada ol sol kezde áıeli Nukenovany óltirdi dep aıyptalǵan Bıshimbaevty aqtaý naýqany aıasynda medıamenedjerler men blogerlerdiń alǵan somasy men aty-jónin jazǵan.

Osy jazbada aty atalǵan «Elmedia» jobasynyń jetekshisi Gúljan Erǵalıeva ózi týraly kórineý jalǵan aqparat taratqany týraly aryzben quqyq qorǵaý organdaryna habarlasqan.

Ádilbekov Telegram-arnasynda jazǵan aqparatty saıasattanýshy Aman Mámbetalıevpen jeke kezdesýinde bilgenin, ol ózin eks-mınıstrdi aqtaý isine qatysýǵa shaqyrǵanyn aıtty.

«Maǵan Bıshimbaevty qoldaý usynysymen Mámbetalıev júgindi», – dedi jýrnalıst sotta.

Alaıda Mámbetalıev muny joqqa shyǵaryp otyr. Ol Qýandyq Bıshimbaevty da, onyń týystaryn da tanymaımyn deıdi.

«Bıshimbaevtyń qoldaıtyn naýqanǵa qatyspadym. Jýrnalıstiń qandaı maqsatta bulaı degenin bilmeımin. Múmkin ózin qorǵaǵysy kelgen shyǵar. О́kinishke qaraı, onyń ne sebepti bulaı degenin bilmeımin», – dedi saıasattanýshy.

Sottalýshy olardyń kezdesýi 2024 jyldyń aqpan aıynda Dostyq kóshesindegi astanalyq dámhanada bolǵanyn jetkizdi. Alaıda, kýáger onymen kezdespegenin aıtyp otyr.

Osyǵan baılanysty Ádilbekov sýdıadan «Mámbetalıevtiń este saqtaý qabileti nashar bolǵandyqtan» oǵan telefon soǵýdy surady.

«Ol qazir munyń bárin bilmeıtin adamnyń keıpin jasap otyr», – dedi sottalýshy.

Aıta keteıik, buǵan deıin 2024 jyly sáýir aıynda jýrnalıst Danııar Ádilbekov qamaýǵa alynǵan edi. Ishki ister mınıstriniń orynbasary Marat Qojaev jýrnalıst olardyń birin jemqorlyq jasady dep jalǵan aıyptaǵanyn jetkizgen edi.