جۋرناليست: تۇركيادا قايىرىمدىلىقپەن تەك ارنايى قورلار عانا اينالىسادى

جۋرناليست دانيار ەسەن قايىرىمدىلىق قورلارىنا قاتىستى حالىقارالىق تاجىريبەنى ءبولىستى, دەپ جازادى qandastar.kz

«تۇركيادا جەر سىلكىنىسى كەزىندە سول ەلدە بولدىم. الانياداعى قازاقتار حالىقتان اقشا جينادى. ەكى بانكتىڭ كارتاسىن كورسەتتى: قازاقستاندىق بانك جانە تۇركيا بانكى. قىزىقتىڭ ءبارى وسى جەردە باستالدى. تۇركيا كارتاسىنا دا حالىق اقشا اۋداردى.

كارتا يەسىنە كەشكە قاراي پوليتسيا كەلىپ, سۇراق-جاۋاپتىڭ استىنا الىپتى.

– ءسىزدىڭ كارتاڭىزعا كوپ اقشا تۇسە باستادى. نەلىكتەن? – دەپ سۇراعان عوي.

ءبىزدىڭ جەرگىلىكتى قازاق:

– كومەك رەتىندە اقشا جيناپ جاتىرمىز, – دەپ جاۋاپ بەرگەن.

سوندا تۇركيا پوليتسياسىنىڭ وكىلى:

– بىزدە ولاي اقشا جيناۋعا رۇقسات جوق. قايىرىمدىلىقپەن تەك ارنايى AFAD ۇيىمى عانا اينالىسادى. ەگەر توقتاتپاساڭىز, ەلدەن شىعارامىز, – دەپ ەسكەرتىپ كەتكەن.

ءسويتىپ, تۇركيا بانكىنىڭ كارتاسىنا اقشا جيناۋ توقتاتىلدى. قازاقستان كارتاسىنا جالعاسا بەردى.

جالپى, تۇركيادا جەكە ادامدار حالىقتان اقشا جيناي المايدى. ءتىپتى, بۋراك ءوزچيۆيتتىڭ ءوزى.

قايىرىمدىلىقپەن تەك ارنايى قورلار عانا اينالىسادى. قورعا تۇسكەن 1 تيىننىڭ ءوزى سايتتا ونلاين كورسەتىلىپ وتىرادى. مينۋت, سەكۋندىنا دەيىن. جانە قايدا جۇمسالعانى دا ءبارى – حالىقتىڭ نازارىندا, ونلاين», – دەپ جازدى جۋرناليست.