جاڭالىقتار
جىل باسىنان بەرى 100-دەن استام بالا تەرەزەدەن قۇلاعان
جىل باسىنان بەرى قۇتقارۋ قىزمەتتەرىنە تۇرعىن ۇيلەردىڭ تەرەزەلەرىنەن بالالاردىڭ قۇلاعانى تۋرالى 102 حابارلاما تۇسكەن, سونىڭ ىشىندە 7 بالا بولعان. بۇل تۋرالى توتەنشە جاعدايلار مينيسترلىگىنىڭ رەسمي سايتى سىلتەمە جاساپ qandastar.kz حابارلايدى.
تجم مالىمەتىنشە, 2024 جىلدىڭ جازىندا دا بالالاردىڭ تەرەزەدەن قۇلاۋىنا قاتىستى وقىس جاعدايلار سانى ارتقان. تجم وكىلدەرى مۇنداي فاكتىلەر تىركەلگەن كەزدە بالالار اۋىر جاراقات الىپ, مۇگەدەك بولىپ قالاتىنىن نەمەسە قايتىس بولاتىنىن ايتادى.
«2024 جىلدىڭ باسىنان بەرى 112 شۇعىل ارەكەت ەتۋ قىزمەتى كەزەكشىسىنىڭ پۋلتىنە تۇرعىن ۇيلەردىڭ تەرەزەلەرىنەن بالالاردىڭ قۇلاعانى تۋرالى 102 حابارلاما كەلىپ ءتۇستى. وسىلايشا, اپات سالدارىنان جەتى ادام قايتىس بولدى, قالعان 95-ءى ءارتۇرلى جاراقاتتارمەن اۋرۋحاناعا جاتقىزىلدى», – دەلىنگەن تجم حابارىندا.
وقىس وقيعالار استانا (18), الماتى (2), شىمكەنت (5) قالالارىندا, قاراعاندى (12), باتىس قازاقستان (6), شىعىس قازاقستان (3), قىزىلوردا (13), اتىراۋ (5), جامبىل (2), قوستاناي (6), اقمولا (5), اقتوبە (2), پاۆلودار (6), سولتۇستىك قازاقستان (1), ماڭعىستاۋ (5), اباي (5), ۇلىتاۋ (5), جەتىسۋ (1) وبلىستارىندا بولعان.
«وتكەن جىلى وسىنداي 170 جاعداي تىركەلدى, ول كەزدە 2 مەن 13 جاس ارالىعىنداعى بالالار ەرەسەكتەردىڭ قاراۋىنسىز قالىپ, تەرەزەلەردەن قۇلاعان. بارلىق جاعدايدا بالالار تەرەزەگە وزدىگىنەن كوتەرىلىپ, تىرەۋىش رەتىندە ءارتۇرلى جيھازداردى قولدانعان نەمەسە موسكيت تورىنا سۇيەنىپ, ونىمەن بىرگە تەرەزەدەن قۇلاپ كەتكەن», – دەلىنگەن حابارلامادا.
