جىل سايىن 15 جاسقا تولماعان 775 مىڭ قىز «انا» اتانادى

ەلدە ايەلدەر اراسىنداعى جۇكتىلىكتىڭ 40 پايىزعا جۋىعى جوسپارسىز ورىن الادى. بالانى ومىرگە اكەلۋ جايىندا سانالى تۇردە شەشىم قابىلدايتىن جۇپتاردىڭ ۇلەسى 30 پايىزدان ءسال عانا اسادى,-دەپ حابارلايدى Qandastar.kz

وتباسىن جوسپارلاۋ كابينەتتەرى جەتكىلىكتى بولا تۇرا, ستاتيستيكا دەرەكتەرى وسىنداي بولىپ وتىر. بۇل جايىندا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات سۇلەيمەن ايتتى. جاسوسپىرىمدەر اراسىندا بوسانۋ مەن تۇسىك جاساتۋ, جىنىستىق جولمەن بەرىلەتىن ينفەكتسيالاردىڭ تارالۋى تىيىلماي تۇر. بۇل سالا الەۋمەتتىك كومەكتى قاجەت ەتەتىن ەڭ وزەكتى ماسەلەگە اينالعان.

اسىرەسە, ءجاسوسپىرىم قىزدار مەن ايەلدەردىڭ رەپرودۋكتيۆتى دەنساۋلىعىن ساقتاۋ ماڭىزدى. قازىر ەلىمىزدە بالا تۋ جاسىنداعى 4,7 ملن-نان استام ايەل بار. ال 18 جاس شاماسىنداعى جاستاردىڭ سانى 7 ميلليونعا جۋىق. ونىڭ ىشىندە ۇلدار 51%, قىزدار 49%. ال دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە, جىل سايىن الەمدە 15-19 جاس ارالىعىنداعى 12 ملن قىز «انا» اتانادى ەكەن, ونىڭ 775 مىڭى – 15 جاسقا دەيىنگى ءجاسوسپىرىم.