جاڭالىقتار
«جىلۋعا قارىز 2 ملرد تەڭگە»: الماتىلىقتاردىڭ شوتى بۇعاتتالىپ, شەتەلگە شىعۋىنا تىيىم سالىندى
الماتىدا تۇرعىنداردىڭ جىلۋ ەنەرگياسى ءۇشىن جينالعان ءىرى كولەمدەگى قارىزى ءوندىرىلىپ جاتىر, دەپ حابارلايدى Qandastar.kz.
«الماتىلىق جىلۋ جەلىلەرى» جشس مالىمەتىنشە, الماتى تۇرعىندارىنىڭ جىلۋ مەن ىستىق سۋعا قارىزى ەكى ميلليارد تەڭگەدەن اسىپ كەتكەن. وسى قاراجاتتى قايتارۋ ءۇشىن جەتكىزۋشى كومپانيا قارىزداردى بەلسەندى تۇردە ءوندىرىپ الۋعا كىرىستى.
جىل باسىنان بەرى 600-دەن استام ابونەنتكە ىستىق سۋ وشىرىلگەن. قارىز كاسىپكەرلەردە دە جينالعان. كومپانيالارعا ءۇش مىڭنان استام سوتقا دەيىنگى تالاپ جولدانعان.
«جىلۋ مەن ىستىق سۋ ءۇشىن قارىزى بار 5184 تولەم جاساۋشىدان بەرەشەكتى ءوندىرىپ الۋ جۇمىسى جۇرگىزىلدى», — دەپ حابارلادى جىلۋ جەلىلەرىنىڭ وكىلدەرى.
قارىزدى ماجبۇرلەپ ءوندىرىپ الۋ ءۇشىن كومپانيا سوتتارعا تالاپ-ارىز بەرىپ, نوتاريۋستارعا دا جۇگىنەدى. سوت ورىنداۋشىلارى بورىشكەرلەردىڭ مۇلكى مەن بانكتىك شوتتارىنا ارەست قويىپ, شەتەلگە شىعۋىنا تىيىم سالادى جانە جالاقىلارىنان قاراجات ۇستاپ قالادى.
وسىنداي قاتاڭ شارالارعا قازىردىڭ وزىندە 1754 ادام ءىلىنىپ وتىر.
«الماتىلىق جىلۋ جەلىلەرى» تۇرعىنداردى تولەمدى كەشىكتىرمەۋگە شاقىرىپ, مۇنداي سانكتسيالاردى بولدىرماۋعا ۇندەيدى. فوتو: الماتى اكىمدىگىنىڭ ءباسپاسوز قىزمەتى.
