Jańalyqtar
«Jylýǵa qaryz 2 mlrd teńge»: Almatylyqtardyń shoty buǵattalyp, shetelge shyǵýyna tyıym salyndy
Almatyda turǵyndardyń jylý energııasy úshin jınalǵan iri kólemdegi qaryzy óndirilip jatyr, dep habarlaıdy Qandastar.kz.
«Almatylyq jylý jelileri» JShS málimetinshe, Almaty turǵyndarynyń jylý men ystyq sýǵa qaryzy eki mıllıard teńgeden asyp ketken. Osy qarajatty qaıtarý úshin jetkizýshi kompanııa qaryzdardy belsendi túrde óndirip alýǵa kiristi.
Jyl basynan beri 600-den astam abonentke ystyq sý óshirilgen. Qaryz kásipkerlerde de jınalǵan. Kompanııalarǵa úsh myńnan astam sotqa deıingi talap joldanǵan.
«Jylý men ystyq sý úshin qaryzy bar 5184 tólem jasaýshydan bereshekti óndirip alý jumysy júrgizildi», — dep habarlady jylý jelileriniń ókilderi.
Qaryzdy májbúrlep óndirip alý úshin kompanııa sottarǵa talap-aryz berip, notarıýstarǵa da júginedi. Sot oryndaýshylary boryshkerlerdiń múlki men banktik shottaryna arest qoıyp, shetelge shyǵýyna tyıym salady jáne jalaqylarynan qarajat ustap qalady.
Osyndaı qatań sharalarǵa qazirdiń ózinde 1754 adam ilinip otyr.
«Almatylyq jylý jelileri» turǵyndardy tólemdi keshiktirmeýge shaqyryp, mundaı sankııalardy boldyrmaýǵa úndeıdi. Foto: Almaty ákimdiginiń baspasóz qyzmeti.
