Jylytý maýsymyna daıyn bolmaǵan: Saran qalasynyń ákimi qyzmetinen bosatyldy

Foto: ashyq derekkóz

Qaraǵandy oblysyna qarasty Saran qalasynyń ákimi Erkin Baýlyqov qalada jylý berý maýsymynyń bastalýynda olqylyq jibergeni úshin qyzmetinen bosatyldy. Qala basshysy qyzmetin ýaqytsha Maqsat Qaıreshov atqaratyn boldy. Bul týraly oblystyq ákimdik habarlady, dep jazady qandastar.kz

Eske salsaq, buǵan deıin Qaraǵandy oblysyndaǵy Saran qalasynda qala turǵyndary áleýmettik jelide jylýsyz otyrǵanyn aıtyp, shaǵymdanǵan edi. Keıin Saran qalasynyń ákimi Erkin Baýlyqov osy máselege qatysty vıdeoúndeý joldady. Úkimet otyrysynda osy másele kezekten tys kóterilip, premer-mınıstr Oljas Bektenov qaladaǵy jaǵdaı boıynsha tekseris júrip jatqanyn, tekserý nátıjesi boıynsha materıaldar quqyq qorǵaý organdaryna jiberiletinin aıtty. Al 16 qazanda Sarandaǵy úılerdi mamandar qaıtadan eski qazandyqtarǵa qosyp jatqany málim boldy. 28 qazanda qyzmettik mindetterin tıisinshe oryndamaǵany úshin, atap aıtqanda, jylytý maýsymyna daıyndyqty jetkiliksiz túrde baqylaǵany úshin Saran qalasynyń ákimi Erkin Baýlyqov pen Qaraǵandy oblysynyń energetıka jáne TKSh basqarmasynyń basshysy Tilektes Dosaev qatań sógis alǵany, al oblys ákiminiń birinshi orynbasary Azamat Taıjanovqa eskertý túrinde tártiptik jaza jarııalanǵany málim boldy.