جاڭالىقتار
زيانى ءتيۋى مۇكىن. ۆيتسە-مينيستر «جاڭبىر ادامنىڭ» ارەكەتىنە قاتىستى پىكىر ءبىلدىردى
فوتو: gov.kz
اۋىل شارۋاشىلىعى ۆيتسە-ءمينيسترى ۇكىمەت وتىرىسىنان كەيىن باق وكىلدەرىنە سۇحبات بەردى, دەپ حابارلايدى «ادىرنا» ۇلتتىق پورتالى.
ۆيتسە-مينيستر ازات سۇلتانوۆ ەل ىشىندە «جاڭبىر ادام» اتانىپ كەتكەن التاي اينابەكتىڭ ارالدى جاڭبىر سۋىمەن سۋعا تولتىرۋ جوباسى جايلى پىكىر ءبىلدىردى.
«ءبىز زاڭدى بىرنەشە رەت زەرتتەدىك. بىزگە سۋبسيديا سۇراقتارىمەن شەتەلدەن دە ماماندار كەلگەن. ماڭعىستاۋ, باتىس قازاقستان وڭىرلەرىندە 2-3 جىل بۇرىن سۋمەن پروبلەما بولعانىن بىلەتىن شىعارسىز. سول كەزدە بۇلت شاقىرىپ, جاڭبىر جاۋعىزايىق دەگەن ۇسىنىس بەرىلدى. بىراق بۇل ماسەلەنىڭ بىرنەشە قىرى بار. ءبىر جاعىنان ەكولوگيانىڭ ماسەلەلەرى دە بار. بۇل تابيعات قوي. ءبىر جەردە جاڭبىر جاۋعانىمەن, كەلەسى ءبىر جەرگە زيانى ءتيۋى مۇمكىن. مىنا جەردە جاڭبىر جاۋعانىمەن, باسقا جەردەن ىلعالى اۋىپ كەتۋى مۇمكىن. ونىڭ ءبارىن زەرتتەۋ قاجەت», – دەدى ول.
ۆيتسە-مينيستر بۇل ءتاسىل ءالى جان-جاقتى زەرتتەۋدى قاجەت ەتەدى دەپ وتىر.
«ەكولوگيا مينيسترلىگىمەن بىرگە جۇمىس ىستەدىك. بىراق قازىرگى تاڭدا ەشقانداي عىلىمي قورىتىندى دا, ناقتى تاجىريبە دە جوق. سوندىقتان ناقتى بىردەڭە ايتۋ قيىن. ونداي جوباعا سۋبسيديا بەرۋ دەگەن بىزدە ەشقانداي زاڭعا جاتپايدى», – دەدى ازات سۇلتانوۆ.
