«زولوتايا جيزن» گازدالعان سۋسىنىنا تەكسەرىس جۇرگىزىلدى: ونى ىشۋگە تىيىم سالىنا ما?

فوتو: اشىق دەرەككوز

قازاقستاندا «زولوتايا جيزن» گازدالعان سۋسىنىنا تەكسەرىس جۇرگىزىلدى. سۋسىندى ىشۋگە قىرعىزستاندا تىيىم سالىنعان بولاتىن, دەپ حابارلايدى Massaget.kz ءتىلشىسى.

ايتا كەتەيىك, جاقىندا بىشكەكتە اۋعانستاننان اكەلىنگەن «زولوتايا جيزن» گازدالعان سۋسىنى ساتىلىمنان الىنىپ تاستالعانى بەلگىلى بولدى.

قازاقستان دەنساۋلىق ساقتاۋ مينيسترلىگىنىڭ سانيتارلىق-ەپيدەميولوگيالىق باقىلاۋ كوميتەتىنىڭ مالىمەتىنشە, ولار Royal, Paradise, Mani, Pure, «زولوتايا جيزن» حوش ءيىستى الكوگولسىز گازدالعان سۋسىندارعا سانيتارلىق تەكسەرۋ جۇرگىزگەن.

«اتالعان گازدالعان سۋسىنداردى تاڭبالاۋ كەدەن وداعىنىڭ تاماق ونىمدەرىن تاڭبالاۋ بولىگىندە «تەحنيكالىق رەگلامەنتىنىڭ تالاپتارىنا سايكەس كەلمەيتىنى انىقتالدى», – دەپ حابارلادى كوميتەت وكىلدەرى Tengrinews.kz تىلشىسىنە.

قازاقستاندىق ماماندار سۋسىنداردا «قۇرامىندا بوياعىش (ازورۋبين ە122) بار» دەگەن ەسكەرتۋ جازۋى جوق ەكەنىن انىقتادى. دەنساۋلىق ساقتاۋ مينيسترلىگىنىڭ مالىمەتى بويىنشا, ول بالالاردىڭ بەلسەندىلىگى مەن نازار اۋدارۋىنا تەرىس اسەر ەتۋى مۇمكىن.

سونىمەن قاتار, پاكەتتەردە سۋسىنداردىڭ قۇرامى مەن تاعامدىق قۇندىلىعىنىڭ كورسەتكىشتەرى, سونداي-اق شىعارىلعان كۇنى مەن جارامدىلىق مەرزىمى جوق.

«سونداي-اق, اتالعان سۋسىنداردا سايكەستىك تۋرالى دەكلاراتسيالار جوق ەكەنى انىقتالدى, بۇل دايىنداۋشىنىڭ (يمپورتتاۋشىنىڭ) كەدەن وداعى تەحنيكالىق رەگلامەنتتەرىنىڭ مىندەتتى تالاپتارىنا سايكەستىگىن باعالاۋ راسىمدەرىنەن وتپەگەنىن كورسەتەدى», – دەپ ءتۇسىندىردى دەنساۋلىق ساقتاۋ مينيسترلىگى.

ىشكى نارىقتى قورعاۋ ماقساتىندا كوميتەت تەكسەرۋ ناتيجەلەرى تۋرالى «اتامەكەن» ۇلتتىق كاسىپكەرلەر پالاتاسىنا حابارلادى. ول, ءوز كەزەگىندە, ساۋدا كاسىپورىندارىنا رۇقسات قۇجاتتارىنسىز اتالعان ءونىمدى ساتىپ الماۋدى ەسكەرتۋى كەرەك. «زولوتايا جيزن» سۋسىنىن جانە باسقالارىن ساتۋعا ءالى رەسمي تىيىم جوق.

سۋسىندى ىشكەننەن كەيىن قازاقستاندىقتار اراسىندا ۋلانۋ تۋرالى شاعىمدار تىركەلمەگەن.