«زورلىق بەلگىلەرى جوق»: استانادا تاستاندى عيماراتتان دەنەسى تابىلعان وقۋشىنىڭ اتا-اناسى پوليتسيانىڭ نۇسقاسىمەن كەلىسپەيدى

فوتو: ۆيدەودان سكرين/اۋرەليانىڭ اتا-اناسى

استانادا 14 جاستاعى وقۋشى قىزدىڭ جۇمباق ءولىمى جەرگىلىكتى تۇرعىنداردىڭ جاعاسىن ۇستاتتى. قىزدىڭ دەنەسى بۇرىن بالاباقشا بولىپ, كەيىن قاراۋسىز قالعان عيماراتتان تابىلدى. پوليتسيا مارقۇمنىڭ دەنەسىنەن زورلىق بەلگىلەرى تابىلماعانىن ايتتى. بۇل تۋرالى Stan.kz اقپارات اگەنتتىگى كتك ارناسىنا سىلتەمە جاساپ حابارلايدى.

تاستاندى عيمارات استانالىق تۇرعىنداردى ۇرەيدە ۇستاپ كەلە جاتقانىنا ءبىرشاما ۋاقىت بولعان. العاشىندا بالاباقشا بولعان, كەيىن نىساندى سەكتانتتار پانا ەتكەن. ءبىراز ۋاقىت تاستاندى بولعان نىساندى كەيىن مارگينالدار جايلاعان. سودان بەرى عيمارات قاڭىراپ تۇر.

جەرگىلىكتى تۇرعىندار قاراۋسىز قالعان عيماراتتان 14 جاستاعى اۋرەليانىڭ دەنەسى تابىلماي تۇرىپ, تاعى ءبىر ەر ادامنىڭ ءمايىتى انىقتالعانىن ايتادى.

وقۋشى ول جەرگە قالاي جانە نە ءۇشىن بارعانى, سونداي-اق قانداي جاعدايدا كوز جۇمعانى بەلگىسىز. مارقۇم اتاسىنىڭ ۇيىنە قوناققا بارعان. سەرۋەنگە شىققان ءجاسوسپىرىم ۇيگە سول كۇيى ورالعان جوق. جاقىندارى سۋىق حاباردى بىرنەشە ساعاتتان سوڭ ەستىگەن.

«مەن وعان ساعات 18:25-تەن باستاپ حابارلاسا باستادىم, بايلانىسقا شىقپادى. ساعات 10-عا دەيىن ءار بەس مينۋت سايىن قوڭىراۋ شالدىم. سىرتقا شىعىپ ءارى-بەرلى ءجۇردىم, ويتكەن جۇرەگىم تىنشىمادى. ەندى ولگەنشە جانىم تىنىش تاپپايدى», – دەيدى قىزدىڭ اتاسى گەننادي ەپوۆ.

پوليتسيا قىزىدڭ اتا-اناسىنا مارقۇمنىڭ جۇرەگى توقتاپ قالعان دەپ ايتقان. سوزدەرىنە سەنسەك, ساراپشىلار وقۋشىنىڭ دەنەسىنەن زورلىق بەلگىلەرىن تاپپاعان. ال اۋرەليانىڭ اتا-اناسى پوليتسياعا سەنبەيدى. ولاردىڭ ايتۋىنشا, قىز وسى ۋاقىتقا دەيىن دەنساۋلىعىنا شاعىمدانباعان جانە جامان ادەتتەرى جوق دەيدى.

«ءبىز بايقوڭىر اۋداندىق ىشكى ىستەر بولىمىندە بولدىق. ولاردىڭ ايتۋىنشا, قىزىمىزدىڭ جۇرەگى توقتاپ قالعان. مەن بۇعان سەنبەيمىن. ءبارى ادەتتەگىدەي: ءىستى توقتاتىپ, مۇراعاتقا جىبەرەمەك», – دەيدى قىزىنان ايىرىلعان اكە.

وسىمەن ەكى ادامنىڭ ءمايىتى تابىلعان سوڭ تاستاندى عيمارات جەرگىلىكتى تۇرعىنداردى الاڭداتا باستادى. قورقىنىشتى نىساننىڭ جانىنان مەكتەپكە بارىپ كەلەتىن بالالارى ءارلى-بەرلى وتەدى.

«باق-تا قىزدىڭ تاستاندى عيماراتتان تابىلعانىن ايتادى. ال نىساننىڭ بۇرىن-سوڭدى بىرنەشە رەت ورتەنگەنىن, وندا ءۇيسىز ادامداردىڭ پانالايتىنىن ەشكىم ايتپايدى», – دەيدى تۇرعىندار.

استانا قالاسى قۇرىلىس باسقارماسى باسشىسىنىڭ ورىنباسارى دامير ابدۋاليەۆتىڭ ايتۋىنشا, قازىر جۇمىستى باستاپ كەتكەن. ايتۋىنشا, عيماراتقا ەندى كۇزەت قويىلىپ, قورشالادى.

«بۇعان دەيىن نىسان جەكە مەنشىكتە بولعان. مەن وقيعانى تولىق بىلمەيمىن. ەندى عيماراتتى تەحنيكالىق تەكسەرۋدەن وتكىزەمىز, ودان كەيىن جوبالاۋ جۇمىستارىن جۇرگىزەمىز. قازىرگى ۋاقىتتا قورشاۋلار تەز ارادا ورناتىلىپ, كۇزەت ورناتىلادى», – دەيدى ول.