3 jasar bala Prezıdentten alǵys hat aldy

Foto:gov.kz

Búgin Atyraý oblysynyń ákimi Serik Shápkenov úsh jasar Dinmuhammed Jumajanmen jáne onyń ata-anasymen júzdesti. Búldirshinniń qaladaǵy Atyraý yqshamaýdanyndaǵy Oraza aıt toılanǵan oryndy jınastyryp júrgen vıdeosy áleýmettik jelide keń taraǵan edi, dep jazdy qandastar.kz

Serik Shápkenov Dinmuhammedtiń tárbıesi men qorshaǵan ortaǵa degen súıispenshiligine rıza bolyp, raqmetin aıtty. Ol sondaı-aq QR Prezıdenti Ákimshiliginiń jetekshisi Aıbek Dádebaıdyń Memleket basshysy atynan joldanǵan hatyn tabystady.

— Keıde kóp sózdiń ornyna bir ǵana istiń ózi jetip jatady. Dinmuhammed kishkentaı ǵana oıyn balasy bolsa da, onyń áreketi kópke oı saldy. Álbette, ol muny bógde bireýden kórip emes, óziniń otbasynda tazalyq pen tártiptiń mánin túsinip ósip kele jatqandyqtan jasady. Bul — tek tárbıeniń emes, naǵyz otansúıgishtiktiń úlgisi. О́z Otanyna shyn berilgendiktiń belgisi. Osyndaı áreketter Memleket basshysynyń “Taza Qazaqstan” bastamasy ýaqytsha is-shara ǵana emes, ár azamattyń ómir salty bolýy qajettigin kórsetedi. Kishkentaı Dinmuhammedtiń jasaǵany — tazalyqty árkim ózinen bastaýy kerek degen úndeý, — dedi S. Shápkenov.

Dinmuhammedtiń ákesi Erjan Haıroshevtiń aıtýynsha, turǵyndardyń biri ulyn vıdeoǵa túsirip, áleýmettik jelige júktegen.