جاڭالىقتار
دجەننيفەر لوپەستىڭ استاناداعى كونتسەرتىنەن قانشا تابىس تۇسپەك?
فوتو: اشىق دەرەككوز
«استانا كونتسەرت» كومپانياسىنىڭ پروديۋسەرى ماليك حاسەنوۆتىڭ ايتۋىنشا, امەريكالىق جۇلدىز دجەننيفەر لوپەستىڭ استانادا وتەتىن كونتسەرتىنە 15 مىڭعا جۋىق تۋريست كەلەدى دەپ كۇتىلۋدە, دەپ حابارلادى qandastar.kz
بۇل شارا ەل قازىناسىنا 400 ميلليون تەڭگەدەن استام سالىق تۇسىرەدى. كونتسەرت كوممەرتسيالىق نەگىزدە ۇيىمداستىرىلىپ, استانانىڭ حالىقارالىق گاسترولدىك كارتادا «ا» ساناتىنداعى ورىنداۋشىلار باراتىن باعىتتاردىڭ قاتارىنا قوسىلۋىنا ىقپال ەتەدى.
– ءبىز بۇل كونتسەرتكە شەتەلدىك جانە جەرگىلىكتى 15 مىڭنان استام قوناق كەلەدى دەپ بولجاپ وتىرمىز. بۇل تۋريزم مەن قىزمەت كورسەتۋ سەكتورىنا, اسىرەسە HoReCa جۇيەسىنە, شامامەن 6,5 ميلليارد تەڭگە پايدا اكەلمەك. سونىمەن قاتار, سالىقتىق تۇسىمدەر 400 ميلليون تەڭگەدەن اسادى, – دەدى حاسەنوۆ.
ونىڭ ايتۋىنشا, وقيعالىق تۋريزم تەك كوڭىل كوتەرۋ ەمەس, سونىمەن قاتار ەكونوميكالىق ءوسىم مەن ينۆەستيتسيا تارتۋدىڭ ءتيىمدى تەتىگى. قازاقستان بۇل باعىتتا العا شىعۋعا قاۋقارلى. دجەننيفەر لوپەستىڭ كونتسەرتى – «ا» ساناتىنداعى العاشقى كوممەرتسيالىق كونتسەرت بولماق. وسى تاجىريبە نەگىزىندە استانا اكىمدىگىمەن بىرلەسە وتىرىپ, وقيعالىق ءتۋريزمدى دامىتۋدىڭ ءۇش جىلدىق ستراتەگياسى ازىرلەنبەك. بۇل جوسپار اياسىندا استانادا تاعى 10 ءىرى كونتسەرت ۇيىمداستىرۋ كوزدەلىپ وتىر. نەگىزگى ماقسات – ەلوردانى ورتالىق ازياداعى ءىرى مادەني وقيعالار ورتالىعىنا اينالدىرۋ.
پرەمەر-مينيستر ولجاس بەكتەنوۆ اتالعان باستامانى قولدايتىنىن جەتكىزدى:
– الەمدىك دەڭگەيدەگى جۇلدىزداردى تارتۋ بويىنشا جوسپارلارىڭىزدى بۇعان دەيىن دە بىرنەشە مارتە تالقىلاعان ەدىك. ەندى بۇل ىسكە ناقتى قادام جاسالىپ جاتقانى قۋانتادى. مۇنداي اۋقىمدى ءىس-شارالاردى ۇيىمداستىرۋدا جوعارى تالاپتار قويىلاتىنىن جاقسى بىلەمىز. قازاقستاندى حالىقارالىق دەڭگەيدەگى مادەني شارالاردىڭ تۇراقتى الاڭىنا اينالدىرۋ ءۇشىن بۇل باعىتتاعى جۇمىستى جالعاستىرۋ قاجەت. ۇكىمەت تاراپىنان قولداۋ كورسەتىلەدى, – دەدى ول.
