مينيستر قىزىلوردادا پەرزەنتحانادا ۆيچ جۇقتىرعان ايەل تۋرالى ايتتى

فوتو:ۇكىمەت

دەنساۋلىق ساقتاۋ ءمينيسترى اقمارال ءالنازاروۆا قىزىلورداداعى پەرزەنتحانادا بوسانعان ايەلدىڭ ۆيچ ينفەكتسياسىن جۇقتىرۋ جاعدايى بويىنشا تەرگەۋ جۇمىستارىنىڭ ناتيجەسى تۋرالى ايتتى. بۇل تۋرالى qandastar.kz حابارلايدى.

ءمينيستردىڭ ايتۋىنشا, تەرگەۋ بارىسىندا ينفەكتسيانى تاراتقان پاتسيەنتتىڭ قان ساراپتاماسى باستاپقىدا ۆيرۋس بار ەكەنىن كورسەتپەگەنى انىقتالدى.

«انىقتالعانداي, ينفەكتسيانى تاراتقان ناۋقاس قان تاپسىرعاندا ۆيرۋستى جۇقتىرعان بولىپ سانالعانىمەن, قان تالداۋى مۇنى كورسەتپەگەن. بۇل جاعداي بويىنشا ءتيىستى قورىتىندىلار جاسادىق, قازىر بۇيرىقتاردا وزگەرىستەر ەنگىزىپ جاتىرمىز», — دەدى مينيستر.

مينيستر اتالمىش جاعدايعا كىم جاۋاپتى ەكەنىن ناقتى ايتپادى.

«مۇندا تىكەلەي, قاساقانا ستاندارتتاردى بۇزۋ بولماعان. وكىنىشكە قاراي, الەمدە سۇر-نەگاتيۆتى, سۇر-ءپوزيتيۆتى تەرەزە دەگەن تاجىريبە بار. ياعني, بۇل ينكۋباتسيالىق كەزەڭ — بۇل كەزەڭدە دياگنوز كلينيكالىق, قۇرالدىق نەمەسە لابوراتوريالىق تۇردە راستالمايدى. بۇل پاتسيەنت سۇر-نەگاتيۆتى تەرەزەدە قان تاپسىرعان», — دەدى ءالنازاروۆا.

مينيستر بالاعا جاسالعان ساراپتاما تەرىس ناتيجە بەرگەنىن اتاپ ءوتتى.

«وكىنىشكە قاراي, الەمدە وسىنداي جاعدايلار كەزدەسەدى. باقىلاۋدى كۇشەيتۋ ءۇشىن ءتيىستى نورماتيۆتىك-قۇقىقتىق اكتىلەردى قازىر ەنگىزىپ جاتىرمىز. بۇل جۇمىستى سانيتاريالىق-ەپيدەميولوگيالىق باقىلاۋ كوميتەتى جۇرگىزىپ جاتىر», — دەدى مينيستر.

ەسكە سالساق, بۇعان دەيىن قىزىلوردا وبلىسىندا اۋىر بوسانعان ايەلگە قان قۇيۋ كەزىندە «ۆيچ» ينفەكتسياسىن جۇقتىرعانى تۋرالى جازعان ەدىك.