تۇركىستان وبلىسىندا 14 جاستاعى قىزدى كورشىسى جۇكتى قىلىپ قويعان

فوتو: pixabay

كەلەس اۋدانىندا 37 جاستاعى ەر ادام 8-سىنىپ وقۋشىسىن جۇكتى قىلىپ قويعان, دەپ حابارلايدى  qandastar.kz اقپارات پورتالى ينفورمبيۋروعا سىلتەمە جاساپ.

14 جاستاعى قىزدىڭ قۇرساعىندا ءسابيى بار ەكەنىن اناسى كەش ءبىلىپ, پوليتسياعا شاعىمدانعان. قازىر كامەلەت جاسىنا تولماعان قىزدى زورلادى دەگەن كۇدىكپەن 37 جاستاعى ازامات ۇستالدى. ول جابىرلەنۋشىنىڭ كورشىسىنە كەلىپ جۇرگەن ادام ەكەن.

«ءىشى ءوسىپ جاتتى. قاتتى سەمىردى. تەكسەرۋگە اپارسام جۇكتى, سودان ءبىلدىم.ازات دەگەن زورلاعان, قىزىم «ماما, ءسىز جوق كەزدە زورلادى» دەدى, ولتىرەمىن دەپ قورقىتقان», — دەيدى قىزدىڭ اناسى.

ەڭ سوراقىسى, كامەلەت جاسىنا تولماعان قىز جەتى اي بويى قۇرساعىندا ءسابيى بار ەكەنىن ەشكىمگە ايتپاعان دەيدى اناسى. ءتىپتى, مەكتەپكە بارىپ, ساباق وقىپ ءجۇرىپتى.

تۇركىستان وبلىسى ءبىلىم ءبولىمى قازىرگى تاڭدا ءجاسوسپىرىمنىڭ داعدارىس ورتالىعىنا ۋاقىتشا ورنالاستىرىلعانىن جەتكىزدى. وعان قاجەتتى پسيحولوگيالىق كومەك كورسەتىلۋدە. سونداي-اق اۋداندىق پوليتسيا ءبولىمى تاراپىنان تەرگەۋ امالدارى جۇرگىزىلىپ جاتىر.

قازىر پوليتسيا سوت-مەديتسينالىق ساراپتاماسىن تاعايىنداپ, تەرگەۋ جۇرگىزىپ جاتىر. ال, جابىرلەنۋشىنىڭ اناسى كىنالى ادام ءتيىستى جازاسىن السىن دەپ وتىر.