جاڭالىقتار
1 ملن ادامنىڭ ەڭبەك شارتى جوق: «ادىلدىك جانە وركەندەۋ» قورى ەڭبەك قۇقىعىن قورعاۋدى جالعاستىرادى
فوتو: كۋرسيۆمەديا
«ادىلدىك جانە وركەندەۋ» قوعامدىق قورىنىڭ جوبالارى مەن باستامالارى كاسىپورىندارداعى قاۋىپسىزدىك تەحنيكاسىن ساقتاۋ, مەكتەپتەگى تاماق ساپاسىن باقىلاۋ, جوندەلگەن جولدىڭ ساپاسىن تەكسەرۋ سەكىلدى ماڭىزدى ماسەلەلەرگە ارنالعان. قور قازاقستاندىقتاردىڭ ەڭبەك قۇقىعىن قورعاۋعا قاتىستى تەگىن زاڭگەرلىك كومەك كورسەتەدى. جاقىندا قور ەڭبەك قۇقىعىن بۇزۋ فاكتىلەرىن انىقتاۋعا كىرىستى, – دەپ حابارلايدى qandastar.kz
ۇلتتىق ستاتيستيكا بيۋروسىنىڭ مالىمەتىنە سۇيەنسەك, ەلىمىزدە 1 ملن استام ازامات ەڭبەك شارتىنسىز جۇمىس ىستەپ ءجۇر. سونىڭ ءبىر مىسالى, نيكيتا پلەتنەۆ – اقمولا وبلىسى, تالاپكەر اۋىلىندا گاز قۇبىرىن جۇرگىزۋگە جۇمىسقا الىنادى. ول ءوز جۇمىسىن تياناقتى اتقارسا دا, جۇمىس بەرۋشى ونىمەن ەڭبەك شارتىن جاساسپايدى جانە سونى جەلەۋ ەتىپ ەڭبەك اقىسىن تولىق كولەمدە تولەمەيدى.
ەكونوميكاداعى مۇنداي «كولەڭكەلى» قۇبىلىستارمەن مەملەكەت بارىنشا كۇرەسىپ جاتقانمەن, رەسمي دەرەكتەر ەڭبەك شارتىنسىز جۇمىس ىستەپ جۇرگەن ازاماتتاردىڭ از ەمەستىگىن كورسەتىپ وتىر. ولاردىڭ اراسىندا جاستار دا, ەگدە جاستاعى ازاماتتار دا, اۋىل ەڭبەككەرلەرى مەن قالالىق كاسىپورىنداردىڭ قىزمەتكەرلەرى, ءبىلىمى جوق ازاماتتارمەن قاتار, ديپلومى بار قازاقستاندىقتار دا بار.
ەڭبەك شارتىنسىز جۇمىس ىستەۋدىڭ سالدارى قانداي? بۇل – دەمالىسسىز جۇمىس ىستەۋ, الەۋمەتتىك تولەمدەردەن قاعىلۋ, جاراقات العان جاعدايدا كەپىلسىز قالۋ. ماڭداي تەرمەن تاپقان ادال اقىنى الا الماي, سەبەپسىز جۇمىستان قۋىلۋ دەگەن ءسوز. مۇنداي جۇمىس بەرۋشى جۇمىسكەرمەن قوسا, مەملەكەتتەن دە ايلاسىن اسىرىپ وتىر. سەبەبى, تابىسىن جاسىرادى.
شارت جاساسۋدان نەمەسە ونىڭ ءبىر داناسىن قىزمەتكەردىڭ قولىنا بەرۋدەن باس تارتقان جۇمىس بەرۋشى ەڭبەك كودەكسىنىڭ 33-بابىن ورەسكەل بۇزىپ وتىر. دەمەك, مۇنداي جاعداي «ادىلدىك جانە وركەندەۋ» قوعامدىق قورىنا جۇگىنۋگە سەبەپ بولا الادى.
قوعامدىق قور بارلىق قازاقستاندىقتان ەڭبەك شارتىنسىز جۇمىسقا الۋ فاكتىسى تۋرالى حابارلاۋدى سۇرايدى. ءوزىڭىز, دوسىڭىز نەمەسە تۋىسىڭىز كەلىسىمشارتسىز جۇمىس ىستەسە, جۇمىس بەرۋشى ەڭبەك قۇقىعىن بۇزسا – قورعا حابارلاڭىز.
اقپاراتتى +7 778 978 0212 نومىرى بويىنشا نەمەسە adil.enbek@gmail.com پوشتاسىنا جىبەرۋگە بولادى. قاجەت بولعان جاعدايدا قور ءوتىنىشتىڭ قۇپيالىلىعىنا كەپىلدىك بەرەدى.
