1051 ادام قايتا الماي وتىر: قازاقستاندىق اۋەكومپانيالار بىرقاتار ەلگە اۋە رەيستەرىن توقتاتتى

فوتو: t.me/airastana

قازاقستاندىق اۋەكومپانيالار قاۋىپسىزدىكتى قامتاماسىز ەتۋ ماقساتىندا دۋباي مەن دوحا قالالارىنا بىرقاتار رەيستى ۋاقىتشا توقتاتتى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

كولىك مينيسترلىگىنىڭ مالىمەتىنشە, 2025 جىلعى 24 ماۋسىم كۇنگى جاعداي بويىنشا تاياۋ شىعىستاعى اسكەري-ساياسي احۋالدىڭ كۇرت شيەلەنىسۋىنە بايلانىستى بىرقاتار ەلدە رەسمي تۇردە شەكتەۋلەر ەنگىزىلىپ, ازاماتتىق اۆياتسياعا ارنالعان اۋە كەڭىستىكتەرى جابىلدى.

ء«ماجبۇرلى شارالار قارۋدى قولدانۋ قاۋپى, ناۆيگاتسيالىق جۇيەلەردىڭ دۇرىس جۇمىس ىستەمەۋى, اۋە قورعانىسى جۇيەلەرىنىڭ بەلسەندىلىگى جانە ازاماتتىق اۋە كەمەلەرىنىڭ ۇشۋى ءۇشىن جوعارى تاۋەكەلدەرگە بايلانىستى قابىلداندى», – دەلىنگەن مينيسترلىك حابارلاماسىندا.

سوڭعى مالىمەتكە سايكەس, مىنا ەلدەردە شەكتەۋلەر ەنگىزىلگەن:

— يزرايل اۋە كەڭىستىگى تولىق جابىق;

يران اۋە كەڭىستىگى تولىق جابىق (ونىڭ ىشىندە پارسى جانە ومان شىعاناقتارى);

يراك, يوردانيا, ليۆان – زىمىران مەن درون شابۋىل قاۋپىنە سايكەس ۇشۋلاردى ۋاقىتشا شەكتەۋ;

كۋۆەيت, باحرەين, ءباا – رەيستەردى شەكتەۋ جانە توقتاتۋ, ءىشىنارا قاقتىعىس ايماعىنا جاقىن مارشرۋتتاردى بۇعاتتاۋ.

ءىرى حالىقارالىق اۆياتاسىمالداۋشىلار دا رەيستەردى ۋاقىتشا توقتاتقان. ولاردىڭ قاتارىندا Air France-KLM, United, American Airlines, Japan Airlines, Air Canada دۋباي, دوحا جانە ەر-ريادقا ۇشۋدى توقتاتتى. Qatar Airways ۇشۋ كەستەسىن رەتتەيدى. Etihad رەسمي ەسكەرتۋ جاسادى. Emirates قاقتىعىس ايماعىن اينالىپ ۇشۋدى جالعاستىرىپ جاتىر.

«وسىعان بايلانىستى قازاقستاندىق اۋە كومپانيالارى قاۋىپسىزدىكتى قامتاماسىز ەتۋ ماقساتىندا دۋباي مەن دوحا قالالارىنا بىرقاتار رەيستى ۋاقىتشا توقتاتتى. جالپى العاندا بۇل جاعداي 1 734 جولاۋشىعا اسەر ەتتى», – دەپ مالىمدەدى كولىك مينيسترلىگى.

ەلىمىزدەن شەتەلگە شىقپاق بولعان ادام سانى 683 بولسا, شەتەلدەن ەلگە ورالاتىن ادام سانى – 1051 ادام.

«قازاقستاندىق اۆياكومپانيالاردىڭ پارسى شىعاناعى ەلدەرىنە ۇشۋعا باعىتتالعان رەيستەردى توقتاتا تۇرۋى – ايماقتاعى اسكەري-ساياسي جاعدايدىڭ كۇرت شيەلەنىسۋىنە نەگىزدەلگەن ءماجبۇرلى شارا. اۋەكومپانيالار قابىلداعان شەشىم حالىقارالىق تاجىريبەگە سايكەس قابىلداندى. باستى ماقسات – جولاۋشىلار مەن ەكيپاج مۇشەلەرىنىڭ قاۋىپسىزدىگىن قامتاماسىز ەتۋ», – دەلىنگەن ۆەدومستوۆ حابارلاماسىندا.

مينيسترلىك وكىلدەرىنىڭ حابارلاۋىنشا, قولدانىستاعى زاڭناماعا سايكەس, جولاۋشىلار ىستىق تاماقپەن, قوناقۇي جانە ترانسفەرمەن قامتاماسىز ەتىلدى.

توقتاتىلعان نەمەسە كەيىنگە شەگەرىلگەن رەيستەر بويىنشا جولاۋشىلار
تەگىن قايتا برون قويا الادى نەمەسە اۋە بيلەتتەرىنىڭ قۇنىن تولىق قايتارىپ الا الادى.

قوسىمشا اقپارات الۋ ءۇشىن مىنا نومىرلەرگە حابارلاسۋ قاجەت:

Air Astana
help.airastana.com

+7 727 244 4477 (24/7)
+7 7172 584477 (24/7)
+7 702 702 4477 (24/7)
+7 7272 44 44 78 (24/7)
WhatsApp: +7 702 702 00 74 (24/7)Online chat: airastana.com (24/7)

SCAT
+7 7252 99 88 80
+7 701 738 25 76

قازاقستاننىڭ اۆياتسيالىق اكىمشىلىگى
+7 7172 79 82 15

ەسكە سالساق, يزرايل يراننىڭ اتىستى توقتاتۋ رەجيمىن بۇزىپ, تاعى زىمىران ۇشىرعانىن مالىمدەدى.

بۇعان دەيىن اقش پرەزيدەنتى دونالد ترامپ يزرايل مەن يران تولىق اتىستى توقتاتۋ تۋرالى كەلىسىمگە كەلگەنىن ايتقان ەدى.