11 اقپان – عىلىمداعى ايەلدەر مەن قىزداردىڭ حالىقارالىق كۇنى

بۇل كۇن ايەلدەر مەن قىزدارىمىزدىڭ عىلىم مەن تەحنيكا سالاسىنداعى مۇمكىندىكتەرىن دامىتۋعا قولداۋ كورسەتۋدىڭ ماڭىزىن ەسكە سالادى. بۇل تۋرالى قازاقستان پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا الەۋمەتتىك جەلىدەگى پاراقشاسىندا جازدى.

ايدا بالاەۆانىڭ ايتۋىنشا, عىلىمعا قىزىعاتىن قىزدار ءۇشىن ۇلگى الاتىن تۇلعالاردىڭ بولۋى ماڭىزدى. كوميسسيا توراعاسى جاقىندا بيولوگ, بەلگىلى عالىم كۇنسۇلۋ زاكاريا ۆاكتسيناتسيا سالاسىنىڭ دامۋىنا ۇلەس قوسقان ايەلدەردىڭ الەمدىك رەيتينگىنە ەنگەنىن, ونىڭ جەتەكشىلىگىمەن ءبىر توپ عالىم 2020 جىلى وتاندىق «QazVac» ۆاكتسيناسىن ازىرلەگەنىن اتاپ وتكەن. سونداي-اق ايدا بالاەۆا بەلگىلى عالىمدار ناعيما ايتحوجينا مەن پاتشايىم تاجىباەۆا سياقتى تۇلعالارمەن ماقتاناتىنىمىزدى ايتقان. «قازاقستاندىق عىلىم جاڭا كەزەڭگە اياق باسىپ وتىر. مەملەكەت باسشىسى بۇل باعىتتىڭ ماڭىزدىلىعىنا ەرەكشە ءمان بەرىپ  وتىر. وسى سالاداعى اتقارىلىپ جاتقان جۇمىستار ايتارلىقتاي ناتيجە كورسەتەتىن عالىمداردىڭ جاڭا قاۋىمداستىعىنىڭ قالىپتاسۋىنا ىقپال ەتتى. دەگەنمەن بۇل كۇندەرى عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا قاتىساتىن ايەلدەردىڭ ۇلەسى شامامەن 54% قۇرايدى, بۇل – 10 مىڭنان استام ادام. الايدا ولاردىڭ ەسىمدەرى مەن جەتىستىكتەرىنەن كوپشىلىگى بەيحابار. سوندىقتان وسى جازبام ارقىلى بارشاڭىزدى عىلىمداعى ايەلدەردى قولداۋعا جانە ولاردىڭ ەسىمدەرى مەن جەتىستىكتەرىن كوبىرەك ناسيحاتتاۋعا شاقىرامىن», – ايدا بالاەۆا, قازاقستان پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى.