11 AQPAN – ǴYLYMDAǴY ÁIELDER MEN QYZDARDYŃ HALYQARALYQ KÚNI

Bul kún áıelder men qyzdarymyzdyń ǵylym men tehnıka salasyndaǵy múmkindikterin damytýǵa qoldaý kórsetýdiń mańyzyn eske salady. Bul týraly Qazaqstan Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Aıda Balaeva áleýmettik jelidegi paraqshasynda jazdy.

Aıda Balaevanyń aıtýynsha, ǵylymǵa qyzyǵatyn qyzdar úshin úlgi alatyn tulǵalardyń bolýy mańyzdy. Komıssııa tóraǵasy jaqynda bıolog, belgili ǵalym Kúnsulý Zakarıa vakınaııa salasynyń damýyna úles qosqan áıelderdiń álemdik reıtıngine engenin, onyń jetekshiligimen bir top ǵalym 2020 jyly otandyq «QazVac» vakınasyn ázirlegenin atap ótken. Sondaı-aq Aıda Balaeva belgili ǵalymdar Naǵıma Aıthojına men Patshaıym Tájibaeva sııaqty tulǵalarmen maqtanatynymyzdy aıtqan. «Qazaqstandyq ǵylym jańa kezeńge aıaq basyp otyr. Memleket basshysy bul baǵyttyń mańyzdylyǵyna erekshe mán berip  otyr. Osy saladaǵy atqarylyp jatqan jumystar aıtarlyqtaı nátıje kórsetetin ǵalymdardyń jańa qaýymdastyǵynyń qalyptasýyna yqpal etti. Degenmen bul kúnderi ǵylymı-zertteý jáne tájirıbelik-konstrýktorlyq jumystarǵa qatysatyn áıelderdiń úlesi shamamen 54% quraıdy, bul – 10 myńnan astam adam. Alaıda olardyń esimderi men jetistikterinen kópshiligi beıhabar. Sondyqtan osy jazbam arqyly barshańyzdy ǵylymdaǵy áıelderdi qoldaýǵa jáne olardyń esimderi men jetistikterin kóbirek nasıhattaýǵa shaqyramyn», – Aıda Balaeva, Qazaqstan Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy.