جاڭالىقتار
«12 كۇن كومادا جاتى»: وسكەمەندەگى لاگەردە 8 جاستاعى بالا اتكەنشەكتەن قۇلاپ مەرت بولدى
فوتو: ۆيدەودان سكرين
«سچاستليۆايا جيزن» لاگەرىندەگى ۇزارتىلعان كۇن توبىندا وقىپ جۇرگەن 8 جاستاعى ارسەني 11 شىلدە كۇنى ەرەكشە كۇتىمدى قاجەت ەتەتىن بالالارعا ارنالعان اتكەنشەكتەن قۇلاپ قايتىس بولدى. بۇل تۋرالى Stan.kz اقپارات اگەنتتىگى حابارلايدى.
ارسەنيدىڭ اكەسى قايعىلى جاعدايدىڭ قالاي بولعانىن الەۋمەتتىك جەلىدەگى پاراقشاسىندا ايتىپ بەردى.
«ارسەني 11 شىلدە كۇنى «سچاستليۆايا جيزن» لاگەرىندە تاربيەشىنىڭ قاراۋىنسىز ەرەكشە كۇتىمدى قاجەت ەتەتىن بالالارعا ارنالعان اتكەنشەككە وتىرعان. ول اتكەنشەكتەن قۇلاپ, اۋىر جاراقاتتار الدى. سالدارىنان 12 كۇن كومادا جاتىپ, جۇرەگى توقتاپ قالدى. بالام قاراۋسىز قالعان. اتكەنشەك تە قيراپ تۇر, بالالارعا ويناۋعا بولمايدى. لاگەردى تاڭداعاندا مۇقيات بولىڭىز, لەتسەنزياسىن قاراڭىز, قالاي جۇمىس ىستەيتىنىن. بالالارىڭىزعا اباي بولىڭىز, قاراۋسىز قالدىرماڭىز. بۇل ءىستىڭ قاراۋسىز قالعانىن قالامايمىن. ويتكەنى مەنىڭ ۇلىمنىڭ ورنىندا باسقا بالا بولۋى مۇمكىن. بۇعان دەيىن ءبىر قىز قولىن سىندىرعان ەدى», – دەيدى قايتىس بولعان بالانىڭ اكەسى.
ونىڭ ايتۋىنشا, اتالمىش ورتالىق الەۋمەتتىك جەلىگە جارناما بەرىپ, بالالاردى قابىلداپ جاتقان كورىنەدى.
«بۇل اتكەنشەكتەن بىرنەشە بالا قۇلاپ, زارداپ شەككەنىن بىلەمىز. اتكەنشەك ەرەكشە كۇتىمدى قاجەت ەتەتىن بالالارعا ارنالعان, ول وتە اۋىر جانە ونىڭ جان-جاعى قورشالماعان. بولعان جاعدايدان كەيىن «سچاستليۆايا جيزن» ورتالىعى ءالى جۇمىس ىستەپ تۇر. ولار جەلىگە بالالاردى قابىلدايتىنى تۋرالى جارناما بەرگەن ەكەن. ەرتەڭ اتا-انالار پروكۋراتۋراعا بارىپ شاعىم تۇسىرمەك. ويتكەنى بولعان جاعدايعا قاتىستى ءىس قوزعالعان جوق. قوعام بولعان وقيعانىڭ ءمان-جايى مەن تاربيەشىلەردىڭ جاۋاپسىزدىعى تۋرالى ءبىلسىن, وسى ورتالىقتىڭ جانە باسقا دا جەكەمەنشىك ورتالىقتاردىڭ لەتسەنزياسىن تەكسەرسىن. كوپتەگەن اتا-انا بۇل اتكەنشەكتى الىپ تاستاۋعا كەلىسەدى دەپ ويلايمىن», – دەيدى ولار.
