جاڭالىقتار
«12 جاستاعى بالانى سكوتچپەن بايلاپ تاستاعان»: سقو-دا قاراقشىلىق جاساعان كۇدىكتىلەر ۇستالدى
فوتو: دەرەككوز
سولتۇستىك قازاقستان وبلىسىنىڭ پوليتسەيلەرى تايىنشا اۋدانىنىڭ تۇرعىنى مەن ونىڭ جيەنىنە قاراقشىلىق جاساعان كۇدىكتىلەردى ۇستادى, دەپ حابارلايدى Ulysmedia.kz.
Polisia.kz پورتالىنىڭ جازۋىنشا, قىلمىس 9 تامىزعا قاراعان ءتۇنى بولعان. بەلگىسىز ادامدار 41 جاستاعى اۋىل تۇرعىنىنىڭ ۇيىنە كىرىپ, ونى جانە 12 جاستاعى جيەنىن سكوتچپەن بايلاپ, ۇيدەگى بار اقشانى, ەكى تەلەفوندى جانە التىن بۇيىمداردى قولدى قىلعان. كەلتىرىلگەن زالال سوماسى الدىن الا ەسەپتەۋ بويىنشا شامامەن 640 مىڭ تەڭگەنى قۇرادى.
شابۋىل جاساعاندار ۇيدەن شىعىپ كەتكەننەن كەيىن بالا قولىنداعى سكوتچتى تىستەپ شەشكەن. كەيىن الىس ەمەس جەردە ورنالاسقان ۋچاسكەلىك پوليتسيا ينسپەكتورىنىڭ ۇيىنە بارىپ, بولعان جاعداي تۋرالى حابارلاعان.
جاسالعان قىلمىس تۋرالى حابارلاما اۋداندىق پوليتسيا بولىمىنە ساعات 23:40-تا كەلىپ ءتۇستى. پوليتسيانىڭ بارلىق كۇشى دەرەۋ كۇدىكتىلەردى ىزدەۋگە جۇمىلدىرىلدى. ءتارتىپ ساقشىلارى ەسەپتە تۇرعان ادامداردى تەكسەرىپ, اۋىلعا كەلگەن ادامدار مەن بوتەن كولىكتەر تۋرالى اقپارات جيناي باستادى.
ناتيجەسىندە سولتۇستىك قازاقستان وبلىسى مەن اقمولا وبلىسىنىڭ 30 بەن 38 جاس ارالىعىنداعى ءتورت كۇدىكتى تۇرعىنى انىقتالدى. تايىنشا اۋدانىنىڭ پوليتسيا ءبولىمى جانە كريمينالدىق پوليتسيا باسقارماسىنىڭ جەدەل قىزمەتكەرلەرى ولاردى استانا قالاسىنىڭ اۋماعىندا ۇستادى. قازىرگى ۋاقىتتا ءۇش ايىپتالۋشى قاماۋعا الىندى. ۇرلانعان زاتتاردىڭ ءبىر بولىگى تاركىلەنىپ, توناۋ فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر, – دەدى سولتۇستىك قازاقستان وبلىسى پوليتسيا دەپارتامەنتى كريمينالدىق پوليتسيا باسقارماسىنىڭ باستىعى يۆان تەرزيدي.
قازاقستان رەسپۋبليكاسى قىلمىستىق كودەكسىنىڭ 192-بابىنىڭ سانكتسياسىنا سايكەس ادامدار توبىنىڭ الدىن الا ءسوز بايلاسۋىمەن, تۇرعىن جايعا زاڭسىز ەنۋمەن جاسالعان قاراقشىلىق 7 جىلدان 12 جىلعا دەيىنگى مەرزىمگە باس بوستاندىعىنان ايىرۋمەن جازالانادى.
