120 تەڭگە: الماتى ءماسليحاتى قوعامدىق كولىكتە جول ءجۇرۋدىڭ جاڭا ءتاريفىن ماقۇلدادى

فوتو: inbusiness.kz

الماتىدا قالالىق ءماسليحاتتىڭ كەزەكتەن تىس XXI سەسسياسى كەزىندە قوعامدىق كولىكتىڭ قۇنىن 120 تەڭگەگە كوتەرۋ تۋرالى شەشىم قابىلدادى, دەپ حابارلادى Qandastar.kz.

الماتى قالاسى ءماسليحاتىنىڭ دەپۋتاتى, قۇرىلىس, ساۋلەت, ۋربانيستيكا جانە جەر قاتىناستارى جونىندەگى تۇراقتى كوميسسياسىنىڭ توراعاسى نۇرسۇلتان شوقانوۆ بۇل وزگەرىستىڭ سەبەبىن ءتۇسىندىردى.

– بىزدە سۋبسيديا رەكوردتىق كورسەتكىشكە جەتىپ وتىر. بيىل تاسىمالداۋشى كومپانيالارعا ءبولىنىپ وتىرعان 97 ملرد تەڭگە قىزىلوردا, تالدىقورعان سىندى وبلىستىق ماڭىزى بار قالالاردىڭ بيۋجەتىمەن بىردەي. تاريف پەن سۋبسيديا مۇنداي باعىتتا جۇرە بەرەتىن بولسا, باسقارۋعا كەلمەيتىن پروتسەسستەرگە الىپ كەلۋى مۇمكىن. سوندىقتان ءبىز تاريف باعاسىن بىرتىندەپ كوتەرىپ وتىرۋدان ەشقايدا كەتە المايمىز. بىرىنشىدەن, جەرگىلىكتى بيۋدجەتكە تۇسەتىن جۇكتەمەنى ازايتۋىمىز كەرەك. بىراق بۇل شاعىن ءوسىم حالىقتىڭ الەۋمەتتىك وسال توپتارىنا اسەر ەتپەيدى. بۇگىنگى دەيىن كىم تەگىن جۇرسە, ولار ءارى قاراي دا تەگىن جۇرە بەرەدى, كىمنىڭ 50% جەڭىلدىگى بولسا, بۇل جەڭىلدىك ولاردا قالادى. جولاقىنىڭ قۇنى قالانىڭ بارلىق بولىگىندە, بارلىق مارشرۋتتارعا بىردەي. ادام 70 شاقىرىم ءجۇرىپ وتسە دە, وسى 120 تەڭگەنى تولەيتىن بولادى. ايلىق جول ءجۇرۋ اقىسى 7200 تەڭگەدەن 9900 تەڭگەگە كوتەرىلدى, – دەدى ول.

ءماسليحات دەپۋتاتى قولما-قول تولەم جاساۋ مۇمكىندىگىنىڭ نەلىكتەن الىنىپ تاستالعانىن دا ءتۇسىندىردى. تولەمنىڭ قولما-قول جاسالۋى – جۇرگىزۋشىلەردىڭ جۇمىسىن جەڭىلدەتەدى, ولاردى الاڭداۋ سەبەپتەرىن ازايتاتىنىن ايتتى.

سونداي-اق نۇرسۇلتان شوقانوۆ تاريفتەردىڭ كوتەرىلۋىن قولدايتىنىن ايتتى.

ءماسليحات دەپۋتاتتارىنىڭ الدىندا ءسوز سويلەگەن قالالىق موبيلدىلىك باسقارماسىنىڭ باسشىسى ساعىندىق تەلىباەۆ بىلتىر تامىزدا جول ءجۇرۋ ءتاريفى 11 جىلدا العاش رەت 100 تەڭگەگە دەيىن كوتەرىلگەنىنە قاراماستان, جول اقىسىن تولەۋدەن تۇسەتىن كۇندەلىكتى تۇسىمدەر اۆتوبۋستاردى جوندەۋ, قوسالقى بولشەكتەر مەن شىعىن ماتەريالدارىن ساتىپ الۋ سياقتى تاسىمالداۋشىلاردىڭ بارلىق شىعىندارىن وتەمەيتىنىن اتاپ ءوتتى.

«جىل سايىن اۆتوبۋستارعا, قوسالقى بولشەكتەرگە جانە وزگە دە شۇعىل شىعىستارعا باعانىڭ ءوسۋى تىركەلۋدە. قوسالقى بولشەكتەردى ۋاقتىلى ساتىپ الۋ مۇمكىن ەمەس, ال بۇل جولاۋشىلار تاسىمالىنىڭ ساپاسىنا تەرىس اسەر ەتۋدە. سونىڭ سالدارىنان قالا تۇرعىندارى ءادىل شاعىمدار جاسايدى. اكىمدىك پەن جەكە تاسىمالداۋشىلار جىلجىمالى قۇرامدى ۇنەمى جاڭارتىپ وتىرۋ جانە جۇمىس ىستەپ تۇرعان اۆتوپاركتى ساپالى كۇتىپ ۇستاۋ ءۇشىن وراسان زور قاراجات بولۋگە ءماجبۇر», – دەدى ساعىندىق تەلىباەۆ.