قارجىگەر: بەيبىت ەسەپ بولماعاندا ەلىمىزدە 1 دوللاردىڭ باعاسى 200 تەڭگە بولار ەدى

1999-2004 جىلدار مەن 2009-2013 جىلدارى ۇلتتىق بانكتى باسقارعان قارجىگەر گريگوري مارچەنكو اقمارال باتالوۆاعا بەرگەن سۇحباتىندا قازاقستانداعى ەڭ ۇلكەن دەۆالۆاتسيا مەن ەكس-پرەزيدەنتتىڭ قاتە بۇيرىعى تۋرالى ايتتى, دەپ جازدى qandastar.kz

ەكونوميست 1994 جىلى اقپاندا قازاقستاندا بولعان ەڭ ۇلكەن دەۆالۆاتسيانى ەسكە الدى.

ء“بىر ايدا كۋرس 11-دەن 40-قا دەيىن, ياعني 3,5 ەسە قۇلدىرادى. بۇل دەۆالۆاتسيا ۇكىمەتتەگى پرەمەر-مينيستر سەرگەي تەرەششەنكو نۇرسۇلتان نازارباەۆتى بەيبىت ەسەپ جۇرگىزۋگە كوندىرگەن سوڭ بولدى. “ۇلتتىق بانك كوپتەپ اقشا باسىپ شىعارىپ, كاسىپورىندارعا تاراتىپ بەرسىن. ال ولار ءبىر-ءبىرىنىڭ قارىزىنان قۇتىلادى” دەدى. پرەزيدەنتتىڭ بۇيرىعى ۇلتتىق بانكتىڭ ۆيزاسىنسىز قابىلداندى. ويتكەنى ۇلتتىق بانكتىڭ توراعاسى داۋلەت سەمباەۆ بۇعان تۇبەگەيلى قارسى بولدى. بىراق سوعان قاراماستان قاۋلى قابىلداندى. سالدارىنان كۋرس ءبىر ايدا 3,5 ەسە قۇلدىرادى. سول كەزدە ينفلياتسيا ءبىر ايدا 46% بولدى. بىراق بەيبىت ەسەپ جۇرگىزۋ ورەسكەل قاتە ماكروەكونوميكالىق شەشىم بولدى. قازىر كۋرس باعاسى 500-گە جۋىقتادى. ەگەر 1994 جىلعى بەيبىت ەسەپ بولماعاندا ەلىمىزدە 1 دوللاردىڭ باعاسى 200 تەڭگەگە جەتەر-جەتپەس بولار ەدى”, – دەيدى گريگوري مارچەنكو.

ونىڭ ايتۋىنشا, ءبىرىنشى پرەزيدەنت ءوزىنىڭ مەمۋارىندا بۇل تۋرالى جازباعان. بالكىم, ۇمىتىپ كەتكەن بولار. مۇمكىن بۇل وقيعانى ماڭىزدى دەپ ساناماعان دا بولار دەيدى قارجىگەر.

بۇعان دەيىن Stan.kz قازاقستان قور بيرجاسىنداعى ساۋدا-ساتتىق ناتيجەسىندە دوللاردىڭ باعامى 522,91 تەڭگەگە جەتكەنى تۋرالى جازعان ەدى.