Jańalyqtar
«23 jastan bastap júrgize alady»: Toqaev Qazaqstanda avtobýs júrgizýshilerine talaptardy jeńildetetin zańǵa qol qoıdy
Foto: Golos naroda
Qazaqstanda avtobýs júrgizýshilerine qoıylatyn talaptar jeńildetilip, elektromobılderge arnalǵan tegin turaqqa ruqsat berildi. Bul týraly Stan.kz aqparat agenttigi habarlaıdy.
Aqorda tıisti zańǵa memleket basshysy Qasym-Jomart Toqaev qol qoıǵanyn jetkizdi.
«Memleket basshysy «Qazaqstan Respýblıkasynyń keıbir zańnamalyq aktilerine kólik jáne elektrmobılderge arnalǵan ınfraqurylymdy damytý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy», — delingen habarlamada.
Endi qazaqstandyqtar avtobýstardy 25 jastan emes, 23 jastan bastap júrgize alady. Sondaı-aq júrgizý ótili bes jyldan úsh jylǵa deıin qysqartyldy. Buǵan sebep elimizde qoǵamdyq kólik salasynda kadrlar tapshylyǵy bar.
Buǵan deıin ishki ister vıe-mınıstri Marat Qojaev avtobýs júrgizýshilerine qoıylatyn talaptardyń tómendeýi jolaýshylardyń qaýipsizdigine áser etpeıtinin jetkizgen edi.
«Bul normaǵa nege barǵanymyzdy túsindirer bolsam, jolaýshylar tasymalymen aınalysatyn bıznes ókilderi elde júrgizýshiler tapshylyǵy kóp degen máseleni kópten beri kóterip keledi. Osy jaǵdaıdy taldaı kele, Qazaqstanda EAEO-nyń barlyq elderiniń eń qatań talaptary bar ekenin túsindik. Onda 21 jastan bastap júrgizýshilerge ruqsat etiledi. Al bizde 25 jastan bastap bes jyldyq júrgizýshi tájirıbesi bolýy kerek. Meniń oıymsha, muny sál tómendetsek jolaýshylar men tasymaldyń qaýipsizdigine aıtarlyqtaı áser etpeıdi», – dep atap ótti ol.
Qojaev barlyq iri avtoparkter men júıelik tasymaldaýshylar baqylanatynyn atap ótti. Bul rette keıingi jyldardaǵy statıstıka qoǵamdyq kólikpen bolǵan jol kólik oqıǵasynyń sany 57% tómendegenin kórsetedi.
Sondaı-aq, qujatta «elektromobıl» jáne «elektr zarıadtaý stanııasy»sııaqty jańa uǵymdar jazylǵan. Endi elektromobılderge turaq úshin arnaıy oryndar qamtamasyz etiledi. Al olardyń ıeleri tólemnen bosatylady. Sonymen qatar qýattaý oryndary da uıymdastyrylmaq.
