قانداستارعا ارنالعان كۆوتا سانىن كوبەيتۋ كەرەك — دەپۋتات

قانداستارىمىزدىڭ ەلگە ورالۋىنا بولىنگەن كۆوتا از. بۇگىن ءماجىلىس دەپۋتاتى ساۋىتبەك ءابدىراحمانوۆ پالاتانىڭ جالپى وتىرىسىندا ۇكىمەت باسشىسىنا وسى ماسەلەنى جەتكىزدى, دەپ حابارلايدى «حابار 24».

ونىڭ ايتۋىنشا, بىلتىر قانداستارىمىزعا 1378 كۆوتا بولىنگەن. بيىل ولاردىڭ سانى 1426-عا جەتتى. «الايدا بۇل وتە از», — دەدى ساۋىتبەك ءابدىراحمانوۆ. بۇرىندارى جىل سايىن 20 مىڭ ادامعا دەيىن كوشىپ كەلۋگە رۇقسات بەرىلەتىن. قانداستار نەگىزىنەن اقمولا, اتىراۋ, شىعىس قازاقستان, باتىس قازاقستان, قوستاناي, پاۆلودار, سولتۇستىك قازاقستان وبلىستارىنا قونىستانادى. دەپۋتات وسى وڭىرلەردە بەيىمدەۋ مەن كىرىكتىرۋ ورتالىقتارىن كوبەيتىپ, مەملەكەتتىك قىزمەتتى قازاق تىلىندە الۋىنا مۇمكىندىك جاساۋ قاجەتتىلىگىن اتاپ ءوتتى.

ساۋىتبەك ءابدىراحمانوۆ, قر پارلامەنتى ءماجىلىسىنىڭ دەپۋتاتى:

– ۇكىمەتتىڭ ەلدەگى ميگراتسيالىق جانە دەموگرافيالىق پروتسەستەردى تۇراقتاندىرۋ ماقساتىمەن قانداستارعا بولىنەتىن كۆوتانىڭ كولەمىن كوبەيتۋ,  بەيىمدەۋ مەن كىرىكتىرۋ ورتالىقتارىن قۇرۋ, رەپاتريانتتارعا مەملەكەتتىك قىزمەتتى قازاق تىلىندە كورسەتۋ, جۇمىس كۇشى ارتىق وڭىرلەردەن ادامداردى سولتۇستىكتەگى وڭىرلەرگە قونىستاندىرۋ سياقتى ماسەلەلەردىڭ شەشىلۋ جولدارىن قاراستىرۋدى, اتقارىلىپ جاتقان, اتقارىلاتىن شارۋادان زاڭدا بەلگىلەنگەن ءتارتىپ بويىنشا جان-جاقتى حاباردار ەتۋدى سۇرايمىز.