32 ءتىس ءۇشىن 34 ملرد تەڭگە ءبولىندى. كىم ءتىسىن تەگىن ەمدەتەدى?

بيىل مىندەتتى الەۋمەتتىك مەديتسينالىق ساقتاندىرۋ بويىنشا ستوماتولوگيالىق ەمدەۋگە 34 ميلليارد تەڭگە ءبولىندى. بىراق تەگىن كومەكتى ارناۋلى ساناتتاعى ازاماتتار عانا الا الدى. ال باسقالاردىڭ شىعىندالۋىنا تۋرا كەلەدى. قازىر ءتىس ەمدەۋ ايتارلىقتاي قىمباتتاعان. ماماندار قىزمەت قۇنىنىڭ وسكەنىن, قاجەتتى قۇرال-جابدىقتىڭ شەتەلدەن الۋىنۋىمەن بايلانىستىرادى. بليتس: — اۋزىمىزدا ءبىر ءتىس جوق, ءبارى ءتۇسىپ قالعان. بارىپ سالدىرايىق دەسەك, ۋداي قىمبات. قايدا باراتىنىمىزدى بىلمەيمىز.

پەنسيا جەتپەيدى. ەندى نە قىلامىز?! — مىسالىعا 1 پلومبانىڭ ءوزى 15 مىڭ تەڭگە. ال ەگەر باسقا تىستەردى ەمدەپ, تازالاۋ بولسا, وندا 500 مىڭعا كەتىپ قالادى. ودان ءتىپتى يمپلانت سالاتىن بولساڭىز, 150 مىڭنان بىرەۋى, ەڭ جاقسىسى. — ءتىسىمدى سالا الماي ءجۇرمىن, استىنعى ءتىسىمدى. ەندى مەنىڭ ءتىسىم جوبامەن 200-400 مىڭعا شىعادى پروتەزدىڭ ءوزى. ەمدەتەتىن ءتىس جوق استىندا. «30 ءتىستىڭ قادىرىن قاقساعاندا بىلەسىڭ» دەگەن ءسوز بار.

ونىڭ كۇتىمىنە دەر كەزىندە نازار اۋدارماي, كەش قالساڭىز, قالتاڭىزدان قوماقتى قارجىنى ساناپ بەرۋىڭىز ابدەن مۇمكىن. ماسەلەن ءتىس جۇلدىرۋ ءۇشىن كەم دەگەندە 10-15 مىڭ تەڭگەڭىز بولۋى كەرەك. ال ونى ەمدەتىپ, پلومبا سالۋ 15 مىڭنان باستالادى. يمپلانت باعاسى بولسا, 100 مىڭ تەڭگەدەن جوعارى. ولەسيا مەلنيك, ستوماتولوگ: — ءبىر ءتىستى ەمدەۋ قۇن كەيدە 80 مىڭ تەڭگەگە شىعۋى مۇمكىن. ناقتى قاي قىزمەتتىڭ قىمبات ەكەنىن ايتۋ وڭاي ەمەس. ءار جۇمىستىڭ قيىندىعى بولادى. نەگىزى باعا, قولدانىلاتىن ماتەريالعا بايلانىستى قويىلادى. وكىنىشكە قاراي قاجەتتى زاتتاردىڭ كوبى ەلىمىزدە ونىدىرىلمەيدى. ءتىس ەمدەۋگە قاجەتتى قۇرال-جابدىقتار قازاقاستاندا مۇلدە وندىرىلمەيدى. كوبىنەسە ولار گەرمانيا, كورەيا جانە قىتايدان ارنايى جەتكىزىلەدى. جالپى جەكە ەمحانالار «كاسىپكەرلىك سۋبەكتى» بولىپ ەسەپتەلەدى, سايكەسىنشە قىزمەت قۇنىن وزدەرى بەكىتەدى. بىراق ونى باقىلاپ ءارى رەتتەپ جاتقان ەشكىم جوق. نازىم بەكتۇرعانوۆا, قر دەنساۋلىق ساقتاۋ مينيسترلىگىنىڭ شتاتتان تىس باس ستوماتولوگى: — بارلىق قۇرال-جابدىق, ءتىپتى ماقتا-تامپوندارىنا دەيىن يمپورتتالادى. ءبىز ينفلياتسيالىق پروتسەستەرگە, تىكەلەي دوللار باعامىنا تاۋەلدىمىز. ينفلياتسيا نەعۇرلىم جوعارى بولسا, سوعۇرلىم قىزمەت كورسەتۋ باعاسى وسەدى. ال بۇل جىل سايىن بولاتىن جاعداي. ارينە, باعانى رەتتەپ وتىرۋ ءبىزدىڭ قولدان كەلمەيتىن دۇنيە. ارنايى ساناتتاعى ازاماتتاردىڭ مەملەكەت تاراپىنان تەگىن ستوماتولوگيالىق كومەك الۋعا مۇمكىندىگى بار.

ماسەلەن كەپىلدەندىرىلگەن تەگىن مەديتسينالىق كومەك پاكەتى اياسىندا «شۇعىل جاردەم» قىزمەتىن كامەلەت جاسقا تولماعان بالالار, جۇكتى ايەلدەر, ارداگەردەر, مۇگەدەكتەر, كوپبالالى انالار, اتاۋلى الەۋمەتتىك كومەك الۋشىلار, زەينەتكەرلەر, جۇقپالى اۋرۋمەن اۋىراتىن ناۋقاستار جانە مۇگەدەك بالانى كۇتۋشىلەر الادى. ال «جوسپارلى كومەك» تەك بالالار مەن جۇكتى ايەلدەرگە قاراستىرىلعان. جاننۇر مۇحانعالي, امسق كەرى بايلانىستى جەتىلدىرۋ جانە اقپاراتتاندىرۋ باسقارماسىنىڭ باسشىسى: — جوسپارلى جانە شۇعىل تۇردە ەم الۋعا كەلگەن ادامدارعا, ءبىرىنشى كەزەكتە, ولارعا ءتىستىڭ ارنايى كاريەسىن ەمدەۋ جانە پەرەدونتيت, پۋلپيت ەمدەۋمەن اينالىساتىن بولادى. ەلىمىزدە 2024 جىلى ستوماتولوگيالىق كومەك كورسەتۋگە 34 ملرد تەڭگە قارجى ءبولىندى. 2023 جىلمەن سالىستىرعاندا 6 پايىزعا ءوستى.

ياعني 2023 جىلى بولىنگەن 32 ملرد تەڭگەدەن 34 ملرد-قا ءوستى. بۇل دەگەنىمىز قىزمەت ساپاسىنىڭ جوعارىلاپ, حالىق تاراپىنان ستوموتولوگيالىق كومەككە مۇقتاجدىعىن جانە ونىڭ قىزمەت كورسەتۋ سانىنىڭ ءوسۋىن بايقاتادى.