Jańalyqtar
Artynda bes balasy qaldy: BQO-da sýǵa batyp bara jatqan qyzdy qutqaramyn dep eki muǵalim mert boldy
Foto: Qanat Shaıhıdenov, Bekarys Ámınov
10 shildede eki muǵalim sýǵa batyp ketti, dep jazdy qandastar.kz
Dál osy kúni 112 pýltine Terekti aýdany Aqjaıyq aýylyndaǵy Jaıyq ózenine eki adam batyp ketkeni týraly habarlama túsken. Bul týraly Stan.kz aqparat agenttigi habarlaıdy.
Eki er adam sýǵa batyp bara jatqan 13 jastaǵy qyzdy qutqarmaq bolǵan.
«Qutqarýshylar oqıǵa ornyna jetkenshe jergilikti turǵyndar sýdan 25 jáne 37 jastaǵy eki er adamnyń denesin alyp shyqty», – dep habarlady oblystyq tótenshe jaǵdaılar departamentiniń baspasóz qyzmeti.
Qaıtys bolǵandardyń biri Abaı aýylynyń 37 jastaǵy turǵyny, aǵylshyn tili muǵalimi Qanat Shaıhıdenov bolsa, ekinshisi – Astanadaǵy Ábish Kekilbaev atyndaǵy BINOM mektebiniń fızıka pániniń muǵalimi Bekarys Ámınov.
Qaıǵyly jaǵdaı bolǵan kúni Qanat otbasymen ózen jaǵasynda demalyp jatqan. Jaqyn jerde jasóspirim qyz ben eki er adam sýǵa túsip júrgen. Kenet qyz sýǵa bata bastaǵan. Sol kezde qyzdyń aǵasy kómekke umtylǵan. Qyzdyń kómekke shaqyrǵan daýsyn estigen Qanat ta sýǵa sekirgen. Qyzdy aman alyp qalǵanymen, ekeýi de jaǵaǵa jete almaǵan.
Bekzat Sábıtov esimdi turǵynnyń aıtýynsha, Qanat Shaıhıdenov Abaı aýylyndaǵy mektepte joǵary bilikti ustaz bolǵan. Artynda jary men bes balasy qalǵan. Úlken ulynyń múgedektigi bar, al kenjesi úsh aı buryn ǵana dúnıege kelgen. Al aýylǵa jazǵy demalysqa kelgen Bekarys Ámınov tamyz aıynda shańyraq kótermek bolǵan.
Qaıǵyly oqıǵanyń erteńine BINOM mektebiniń jelidegi paraqshasynda Bekarys Ámınovtiń otbasy men jaqyndaryna kóńil aıtqan jazba jarııalandy.
«Tańmen jetken sýyq habar bárimizdiń qabyrǵamyzdy qaıystyrdy. Ortamyzdaǵy ardaqty, shákirt júreginen erekshe oryn alǵan, talantty da jas ustazymyz Ámınov Bekarys Qalıollauly dúnıeden ótti degen qaraly habardy aýyr kúızelispen qabyldap otyrmyz. Sene alar emespiz. Bekarys 2000 jyly 4 qazanda dúnıege kelgen. Terekti aýdanynyń týmasy. Joǵary oqý ornyn sátti támamdap, Ábish Kekilbaev atyndaǵy BINOM mektebimizge ashylýynan jas maman retinde kelip, alǵashqy eńbek jolyn osy bilim ordasynda fızıka pániniń ustazy retinde bastady. Ujymda óziniń zerektigimen, jaýapkershiligimen, qarapaıym da elgezek minezimen erekshelendi. Jas bolsa da, synyp jetekshileri ádistemelik birlestiginiń jetekshisi jumysyn úlken jaýapkerlikpen atqardy. Áriptesteri arasynda syıly, ata-analar men oqýshylardyń erekshe qurmetine ıe boldy. Alda jarqyn bolashaǵy, úlken armandary tur edi. Bıyl 2 tamyzda óziniń úılený toıy bolýǵa tıis edi… Bul – orny tolmas aýyr qaza. Jasyndaı jarq etken ómiriniń mezgilsiz úzilýine qaıǵyra otyryp, marqumnyń otbasy men týǵan-týystaryna, áriptesteri men shákirtterge qaıǵyryp kóńil aıtamyz», – delingen jazbada.
