جاڭالىقتار
«34 ميلليون تەڭگە»: 4 جىل بويى قۇمار ويىن ويناعان شەنەۋنىك جۇمىستان بوساتىلدى
فوتو: ربك
ءتورت جىل بويى اكىمدىك قىزمەتكەرى بۋكمەكەرلىك كەڭسەگە 34 ميلليون تەڭگەدەن استام قارجى اۋدارعان, دەپ حابارلايدى Qandastar.kz سايتى Skifnews.kz اقپارات پورتالىنا سىلتەمە جاساپ.
باتىس قازاقستان وبلىسى پروكۋراتۋراسىنىڭ مالىمەتىنە سەنسەك, ورال اكىمدىگىنىڭ قىزمەتكەرى مەملەكەتتىك قىزمەتكەرلەرگە قويىلاتىن سىبايلاس جەمقورلىققا قارسى شەكتەۋلەردى بۇزىپ, بۋكمەكەرلىك كەڭسە ارقىلى قۇمار ويىندارعا قاتىسقان. بىرنەشە اي ىشىندە ول شامامەن 971 مىڭ تەڭگە ءباس تىگىپ, ۇتىلىپ قالعان.
“OLIMPBET” جشس مالىمەتىنشە, 2021 جىلدىڭ 5 ماۋسىمى مەن 2025 جىلدىڭ 22 قاڭتارى ارالىعىندا اكىمدىك قىزمەتكەرى ءوزىنىڭ جەكە شوتىنا 34 ميلليون تەڭگەدەن استام قاراجات اۋدارعان. سونىڭ ىشىندە زاڭناماعا ەنگىزىلگەن وزگەرىستەر كۇشىنە ەنگەننەن كەيىن 1,7 ميلليون تەڭگە سالىپ, سونىڭ 971 مىڭ تەڭگەسىن ۇتىلىپ قالعان. بەلگىلى بولعان جاعدايلارعا بايلانىستى اتالعان قىزمەتكەر جۇمىستان بوساتىلدى”, – دەلىنگەن حابارلامادا.
ايتا كەتەيىك, 2024 جىلعى 9 قىركۇيەكتەن باستاپ پرەزيدەنتتىڭ تاپسىرماسىنا سايكەس زاڭناماعا ەنگىزىلگەن وزگەرىستەرگە وراي مەملەكەتتىك قىزمەتكەرلەردىڭ قۇمار ويىندارعا, سونىڭ ىشىندە ونلاين-ءباس تىگۋگە قاتىسۋى سىبايلاس جەمقورلىققا قارسى شەكتەۋلەردى بۇزۋ بولىپ سانالادى.
ورال پروكۋراتۋراسى وسى نورمالاردىڭ ساقتالۋىن تەكسەرىپ, اكىمدىك, مەملەكەتتىك كىرىستەر باسقارماسى جانە پوليتسيا قىزمەتكەرلەرىنىڭ بۋكمەكەرلىك كەڭسەلەر ارقىلى قۇمار ويىندارعا قاتىسقانىن انىقتادى.
وسىلايشا, تاعى 24 لاۋازىمدى تۇلعاعا تارتىپتىك جازا قولدانىلىپ, ولاردىڭ 16-سى قىزمەتىنەن بوساتىلدى.
